Ua pasia teuteuga o le Tulafono o Faigapalota ma ua mautinoa o le a faaaogā teuteuga i le palota tele a Samoa i le tausaga fou.
Peitai e lei filemu le Palemene i le fia pasia o ia teuteuga. O le vaevaeina o le itumalo o Safata i itumalo e lua, o le isi o Alataua a o le isi o Sa Tunumafono ua tamau nei ma o le a faaaogā i le palota tele o le 2016.
E lei filemu le taitai o le Itu Agai le afioga Palusalue Faapo II, ina ua oo iloiloga a le maota i le vaega 13 o ia teuteuga faasino i le vaevaega o lona itumalo.
Na ia tuuaia ai le Minisita o Faamasinoga ma le Ofisa o le Komesina o Faigapalota, i le taumafai e faia ni faiga faapolokiki i le vaeluaga tonu o Safata, ona e lē o talia e le minisita ma le Kapeneta le talosaga a nisi o le itumalo ia vaelua i ona faalupega o Siulepa ma ona Tua, ma Togamau ma ona Tua.
O le lipoti foi a le komiti faapalemene na iloiloina teuteuga o le tulafono o faigapalota sa latou fautuaina e vaevae loa le itumalo faafaipule i le Safata i Sasae, ma Safata i Sisifo.
O le taumafai atu o Palusalue e teena le teuteuga a le Malo ae faaofi le fautuaga a le komiti faapalemene, na lagona ai loa nisi o lafoga e pei o le faailoa e Palusalue i le Palemene le fia palemia o le tamaitai minisita ma ana taumafaiga o loo taamilo i tua mo le suia o le taitai o le HRPP.
E lei faatafa le minisita i lona togi atu foi o ana lafoga, ma ia faailoa i le Palemene le gaioiga a Palusalue a o i le itu a le HRPP na ia fasioti ai se tasi o faipule sinia sa tulai mai i Safata lea e lei toe manumalo mai ai lava le tofa Pule Lameko i le nofoa o le itumalo, ae ua tulai mai nei i le itumalo o Falealili e pei ona silafia ia Tuiloma Lameko.
E vevesi nei faamatalaga ma felauai mea ai lililo faapolokiki, ae faufautua pea le Fofoga Fetalai i sui mamalu e tautuana o loo faafofoga le maota ma le atunuu. Na mafua lenei tauga upu ona o le lafo teuteu a le minisita i le lafo autu a le taitaifono o le komiti faapalemene sa iloiloina teuteuga o le tulafono o faigapalota.
Sa teena e le taitaifono le afioga Agafili Patisela le lafo teuteu a le afioga i le minisita, peitai na faamanino e le afioga Fiame Naomi, o loo avanoa lana lafo teuteu e tusa o tulafono tumau a le Palemene.
Na fautuaina e le Palemia faipule o le HRPP a o lei tuuina ane le fesili e le Fofoga Fetalai pe talia pe teena le lafo teuteu ma le palota tauvalaau e faamautu ai le au lagolago ma le au tetee, ia manatua o soo se lafo e faatu e le Kapeneta e ao ona lagolagoina uma e le itu a le Malo. Saunoa Tuilaepa o le tagata e faasala ese ai, ua nofo lava ma fai lona iuga.
Ina ua pasia le lafo teuteu ma tolaulau suafa o faipule e lagolago ma tetee na fulisia uma le HRPP e opogi le lafo teuteu, i le 29 palota, ae toa sefulu na teena.
O le lafo teuteu ua manumalo ua leai ai ni suiga i le vaevaega o Safata ae faaaogā loa le itumalo o Alataua ma le itumalo o Sa Tunumafono e pei ona finagalo i ai le Malo. O le isi vaega o le lafo teuteu a le tamaitai minisita, ua toe faasee mai ai i tua le faatuina o itumalo tu taulaga poo urban seats o le a suia ai nofoa o le palota taitoatasi ua soloia nei.
E iai vaega o loo fautuaina e le komiti e tatau ona silasila i ai le Malo ona toe foi atu lea i le Palemene mo le lauliliuina ma faia i ai se faaiuga.
