O lenei faamoemoe ua igoa ole GPA Fiafia Night (Griffith Pasefika Association), poo se po fiafia ale Asosi a tamaiti Pasefika ale Iunivesite o Griffith, e faatasi ile tausaga ona tapenaina.
Ose po fiafia e faaailoa atili ai taleni ma tomai tau tu ma aganuu aemaise o siva ma pese a tamaiti oloo aoaoina ai.
Ose tasi lenei o Iunivesite i totonu o Kuiniselani ua iloga galuega a tamaiti Pasefika aemaise le taulamua e faatāua ma faailoa atu tu ma aga faapasefika i isi lanu ma gagana oloo aumau i lenei setete.
Ole po ole Aso Toonai na tea nei, ose po na mafai ai ona potopoto le toatele o tagata atumotu ole Pasefika aemaise lava ile itumalo o Logan ma ona nuu tuaoi, auā na vaaia le lolofi atu e maimoaina tapenaga matagofie ale fanau e pei lava ona faia i tausaga uma ile vaitau lenei.
E ui lava ile pisi ile suesueina ole poto lautele ae lei solomuli ai le tuu atoa o latou taimi e faataunuu ai tapenaga mo lenei faamoemoe tāua. E lē gata la e afifio atu e maimoa faafiafiaga faaleatunuu, fefaasoaa‘i tu ma aga masani, ae ua fesootai ai ini faamoemoega, ni moemitiga ina ia i‘u ma manuia taumafaiga aemaise lava i tulaga tau aoaoga o alo ma fanau mo lo latou lumanai manuia.
Na auai ma faafiafia ai Asosi a alo ma fanau aoga mai le Iunivesite o le (QUT) Queensland University of Technology faapea le Asosi ale UQ (UQSPIA) University of Queensland South Pacific Islander Association, ma na matagofie le fefiloi ai o aga ale Pasefika ia latou faafiafiaga mananaia o lea po.
Na faatalanoaina le tamaitai o Amelia Lavaki (Peresetene ole GPA), ma ia ta‘ua le tāua tele o lenei asosi ma a latou galuega faatino i tausaga uma, lea e afua ai le tupu ma ola, ile agai atu pea o alo ma fanau i Griffith ona a latou galuega taulogologo male fefaasoaa‘i o aganuu e ala i faafiafiaga, ole tasi lea fesootaiga tele ua tutū faatasi ai ma maua le piitaga o tamaiti.
Na ia ta‘ua ole vaega tupe uma na tauaaoina ele mamalu na faatasi atu i lea afiafi, na agai tonu i teuga tupe ale GPA mo tamaiti Sikolasipi. A‘o maitauina pea le amataina mai o lenei Asosi i tausaga ua mavae, na taulamua ai nisi o alo ma fanau Samoa ma e lē gata i lea, e tele alo ma fanau ua manuia ma atamamai mai i lea Iunivesite.
Ole tausaga e 2012 na Peresetene ai se tasi o alo tamatai o Samoa, sa faauu ai foi i lena taimi le tamaitai poo le faletua ia Emma Tanuvasa (Pacific Island Programs Officer at Griffith University).
E oo mai ile taimi nei oloo fesoasoani malosi Emma e talanoa atu i mātua ma faailoa iai auala e laasia ai e lona alo le sini o lana tausinioga aemaise foi nai tamaitai sitiseni Niu Sila ua aoaoina ile Iunivesite o Girffith.
Na pei e na ose ‘afa itula na saofafai ai le aofia e maimoa i taga eseese male mālie ole aualii sa fai ma fofoga ole po, ia la metotia na faataliē ai le aofia, oi laua ia o Tagoiaega Bruce Manū Sione ma Richard Niu (o liaison officers ale Glenala State High School). Tele faaailoga sa tufa fua i lea po.
