Autalavou Puna o le Olataga EFKS Southwest Brisbane sa fai sao i faafiafiaga o le 56 tausaga o Samoa i Brisbane

Autalavou Puna o le Olataga EFKS Southwest Brisbane sa fai sao i faafiafiaga o le 56 tausaga o Samoa i Brisbane

Na toeitiiti leai se vaipanoa e gaogao o le paka i le itumalo o Logan sa faataunuu ai le faamoemoe o Samoa i Kuiniselani (Logan Garden, Civic Parade Police Park). Na tumutumu ai le mamalu o le atunuu i lenei aai i le aso toonai ua tuanai ona o le fia auai e maimoaina polokalame o le tutoatasi o Samoa i Kuiniselani. E le’i ano lava le toatele o tagata i le ma’ati’ati o le malulu, ae ua manatu, na o le tasi lava i le tausaga e faamanatu ai lenei aso faitaulia ae o se avanoa foi e feiloai ai ma aiga ma uo.

O le Aso Toonai aso 2 o Iuni na faamauina ai le lona lua o aso talu ona amata ma’ati’ati mai le malulu i Kuiniselani peitai o la Toma le soo le talitonu “ E sili a le auai e talitonu ai” i le maimoaina o le sisiina a’e o tagavai e lua a Samoa ma Ausetalia e faamanatuina ai le 56 tausaga talu ona tutoatasi si o tatou Malo o Samoa.

Na mata’ina savali faaaloalo e pei ona amataina i le 7 i le taeao, ona  siitia lea o le viiga i le Atua lea sa taitaia ele susuga ia Ps Manuula Nai o le taitai o le ekalesia Samoan AOG i Kuiniselani, o le matagaluega foi a le Samoan AOG sa lagiina le vii o Samoa ao sisina a’e le tagavai o Samoa ele tofa ia Faimalōtoa Lepā Ioane Pale.

O le afioga i le Peresetene ia Taulapapa Lemalu Roy Slade sa sisiina a’e le tagavai o Ausetalia. Na tatalaina faafiafiaga ele saasaaga faasamoa a le taitai o le Samoa AOG le susuga ia Ps Manuula Nai faapea le matagaluega ona faagasolo lea o faafiafiaga eseese. Na avea le susulu manaia o le la ua mafanafana ma faaosofia ai le fiafia o tagata e usi le maimoa ao faagasolo polokalame o le aso faapitoa o le faamanatuina o le 56 tausaga o Samoa i Kuiniselani.

Na matagofie foi le sao o le autalavou EFKS Southwest Brisbane, i lo latou sao ao faatino faiva o tausala ma manaia e ala i la latou faafiafiaga. E toatele tagata na le gata i le lolofi atu sei fai se eva ma maimoa faafiafiaga, ae sili ai le fia tofo i le anoanoai ma le felanulanua’i o taumafa eseese faa Samoa moni na kukaina ma sasala le manogi i lea foi itulagi.

Na paleni lelei le taimi ma fuafuaga uma e ala i le faatautaiga a fofoga o le aso mai lava i le amataga seia oo atu i le faaiuga, lea sa taualugaina lava ele Mafutaga Tuufaatasi a Samoa i Brisbane, ma lagiina le pese masani “Lota Nuu na ou fanau ai”.

O le failautusi aoao a le Samoa Tuufaatasi (Samoa Combined Association Brisbane Forum) sa fai ma fofoga o le aso Le’apai Vaa II Le’apai, sa vaavaalua ma le  faletua ia Joyita Stanley-Slade.(Faletua o le Peresetene ia Taulapapa Lemalu Roy Slade).

Ua tele upu i Manu ae itiiti upu i mala, auā o se aso na vaaia ai le aao taitai o le Atua i le lagi lelei ma le faatumulia i tagata Samoa faapea foi tagata mai isi atunuu sa auai e molimauina le faamoemoe.a