O le vaiaso talu ai na matuā faatumulia ai foi le Hall a le aoga Maualuga a Eaglevale i Campbelltown i le faatasiga a le Pulega Sini Sasa’e.
Na faaalia e le Taitaifono a le komiti a Tupulaga, Taaloga ma Aganuu a le matagaluega Rev Namusua Mareko o le EFKS a Camden le felanulanuai o lea Aso.
E valu Ekalesia na faatinoina e a latou autalavou faafiafiaga mai atumotu taitasi o le Pasefika.
O le autu o lea aso ina ia malamalama le tupulaga i tu ma aga eseese o nai uso a Pasefika e ui o le vava mamao o atumotu laiti ae peitai oloo vaaia pea le toafilemu i le fusia e le talalelei.
O le susuga Rev Kolia Kolia ma Sootuli o le EFKS a Campbelltown na o latou tauaveina le atunuu o Maori. O Toga na tapena e le EFKS Canterbury i lalo o le taitaiga a Rev Iakopo Leleimalefaga ma le faletua ia Faiesea. O isi atumotu na faatino lava e isi Ekalesia na auai. O se aso mo le fiafia, faasoa ma le aoaoina o tupulaga ma sui i le felanulanuai o le alofa o le Atua i tu ma aganuu eseese a le Pasefika toafilemu.
Na saunoa foi Rev Namusua Mareko, o le masina o Novema le isi a latou polokalame lea ua patino tonu lava ia Samoa. O Ekalesia e valu na auai i le vaiaso talu ai lea o le a toe sauni mai e faailoa le aganuu ma agaifanua a Samoa lava ia.
O se avanoa lelei tele mo talavou e toe fagufagu ma a‘oa‘oina ai i le Faasamoa. E aunoa ma nisi polokalame faapenei oloo faia auā faasinomaga o tupulaga soifua ane i Sini e faavae ai lo latou soifuaga tuputupu a‘e i nei atunuu mamao.
O se avanoa lelei foi mo le mamalu o Sini nei e toe manatu ai i measina a Samoa e ao ona aotauina e le tupulaga lautele mo le lumanai.****
