Ole tasi lenei o aso faapitoa ile tausaga e vaaia ai le laulau sasaa o faiga meaalofa ale tamā ma le fanau ile tina e ala ini meaalofa eseese latou te saunia mo le tina ole aiga. Ae o nei foi meaalofa e vaaia ai foliga lalelei ma le toe momosi ole loomatua poo le tina ile Aso Sa auā o lea ua matuā iloga ona faailoa le alofa faavalea o fanau io latou tina.
Ae ole molimau a nisi o tamā ma nisi ole fanau sa fesiligia pe aisea ua latou soona faaaluina ai tupe ile Aso Sa o Tina ae lē tutusa ma le Aso Sa o Tamā? Ae ole tali ale fanau, ole tina e pei o ia e pipii tele iai le alofa o fanau i soo se taimi aemaise ai ole galuega lava i totonu i soo se aiga ma ekalesia e migoi lava le tina e faatino i soo se mea e fai.
Ae ole tali a nisi o tamā e faapea, ole tamā i totonu ose aiga nate fanauina mai le alofa ile aiga, ae ole tina nate feaveaiina le tamaititi i lona manava i masina e iva ona ia fanauina lea ole ola lea i totonu ole aiga ma ole mafuaaga foi lea ole laulau sasaa iai o meaalofa ale tamā ma le fanau i aso faapenei, ona e fanau mai e ia le ola i totonu ole aiga ma ua avea foi ole pae ma le auli i aiga, nuu ma ekalesia.
Ile felanulanuai o teuga a tina i fale tapuai taitasi ile Aso Sa ua mavae, ose vaaiga matagofie ile tapenaga a fanau ma tamā.
Ole tele o ekalesia ua faatinoina uma lava e tina le faagasoloina o polokalame ole lotu, mai lava ile taitaiina ole sauniga seia oo lava ile laugaina ole afioga ale Atua.
Ua ave ile tina le faamuamua i soo se mea e fai i totonu ole ekalesia i lea taeao ae faapea foi i totonu ole aiga, e ala lea ile saunia o lana malu taeao ae faapea foi ile taumafataga ile Aso Sa.
O nei galuega uma ua avea ose taeao fou i totonu o ekalesia ua suia ai le faalogologo a tamā ma fanau a’o sausau tina ia latou molimau ile faatāuaina o tina i totonu o aiga, nuu ma ekalesia.
E lagona eseese molimau ola na saunia, ae ua toe tata’i ai i loto o tina le tāua ole galuega fautua ma le loto maualalo i totonu ole aiga, ae le gata i lea ia taulamua tina i mea e fai e iloa e maualuga ai le viiga ole Atua.
Ua faatusaina tina ole penina tautele, ole pae ma le auli i totonu ole aiga, ekalesia ma le nuu, nate faamafolafolaina mea ua faaletonu, ae ole tina lelei foi e faaali mai ele tamā ona foliga lelei ile pito i luma auā o ia oloo avea ma fautua malosi ile tamā i soo se mea e fai.
Sa vaaia loimata ole faanoanoa i nisi o falesa ona o nisi o fanau ma tamā ua lē atoa le fiafia ona ua motusia le mafutaga ma le tina ona ole oti, ae o nisi aiga sa vaaia lava foliga fiafia ona oloo soifua mai o latou tina matutua lea ua ta’i 80 tausaga ma le 90 tausaga le matutua, ma o tina nei na pito sili ona ave iai le faamuamua a nisi o ekalesia e ala ia latou molimau.
Ole tele o ekalesia na mae’a loa le sauniga ona fai faatasi lea ole toonai ale ekalesia atoa e patipatia faatasi ai e tamā ma fanau le aso faapitoa o tina, ae o nisi foi ekalesia na tatala le avanoa ile tamā latou te fai toonai faatasi ai mātua ma fanau auā e le maua avanoa faaauro faapenei i totonu o aiga i tausaga taitasi.
