Talu mai ona faaee atu le suafa Tauaaletoa i le Pulenuu o Aukilani le susuga Len Brown, o se taimi muamua lenei faatoa feiloai ai ma lona itumalo o Aukilani i le lio o taitai o le Malo Samoa ma isi foi atunuu o le Pasefika. O lenei feiloaiga sa faataunuuina lea i Magele o le Aai Paia, lea sa molimauina ai le toatele o i latou sa faapea ona faatasi atu ai.
O le afioga i le Faipule o Magele le tofa Su‘a Viliamu Sio sa avea ma Fofoga o le faamoemoe. Na fetalai faafeiloai le tofa Su‘a ma faafetaia ai le alofa o le Atua ina ua mafai ona auina mai se aso matagofie ua mafai ai ona feiloai fiafia ai ma Tauaaletoa, aemaise o le fia faafofoga lea o le mamalu sa aofia ai i se saunoaga mai ia Tauaaletoa talu mai ona faaee atu lenei suafa matai ia te ia.
O le Susuga ia Tuilaepa Malielegaoi Aiono Sailele sa fai ma Malo faaaloalogia o le aso ma o ia foi lea na saunoa e faamalamalama auiliili le uiga tonu ma le mafuaaga na a‘e ai se manatu ina ia faaee atu lenei suafa tāua ia Len Brown ma o le matai foi mai lona nuu o Lepa.
Na ia ta‘ua, o se feiloaiga ina ua fesootai atu le Konesula o le Malo Samoa ma o la talanoa na faailoa atu ai se manaoga ina ia faia se matai mo le Pulenuu o Aukilani.
E lei pine lena feiloaiga ae faagaioi loa fesootaiga ma Len, ma faapea ai loa ona faataunuuina lenei faamoemoe i le tausaga ua tea e ala lea i sauniga mamalu e pei ona masani ai Samoa pe a faafotutupu suafa o le atunuu.
Sa faapea lava ona faatino lenei nofo i totonu o Lepa a o molimauina e Aiga, o le Nuu ma le Itumalo, ae faapea ai le toatele o le aumalaga sa agai atu ma le susuga ia Len Brown i le aso na faataunuuina ai lona matai.
Na faaalia e le susuga Tuilaepa lona agaga faafetai i le afioga Tauaaletoa ona ua iloga ana galuega i tagata Pasefika aemaise lava Samoa.
O lona tulai mai a o avea ai ma pulenuu o Manukau ma seia oo lava ina ua toe tulai mai ai e avea ma Pulenuu o Aukilani, o loo faaauau pea nei galuega lelei ma le tāua e pei ona sa sau ai.
Na saunoa foi Tauaaletoa ma faailoa lona agaga faafetai i le tofa Su‘a Viliamu Sio ma fesootaiga sa faia e tusa ai ma le afuafuaina mai o le faamoemoe e pei ona iai fesootaiga ma le Konesula o Samoa i Aukilani nei, le afioga Faolotoi Reupena Pogi. Na ia faafetaia foi Faolotoi e tusa ai ma lona tali mai, aemaise ai o fesootaiga uma sa faia ma le Palemia o le Malo Samoa.
Na ia faafetaia le mamalu sa auai atu i le Aso Toonai ma ia faailoa ai lona naunau pea ina ia faatumauina le galulue faatasi ma tagata uma auā se manuia o Aukilani atoa ai ma le faatumauina o le galulue soosootau‘au ai o Aukilani, Niu Sila ma Malo uma o le Pasefika.
O le afioga Tauaaletoa o lea foi ua faasauni atu i le palota o le tausaga nei i le masina o Oketopa, auā le filifilia ai o se tasi ina ia faapea ona tulai mai e avea ma Pulenuu o Aukilani auā le isi foi 3 tausaga o lumanai.
E lē toe tau faailoaina galuega lelei sa faia talu ona tulai mai lenei tamalii, aemaise ai o le fetaulaigaala o nofoaafi e pei ona ua pasiaina nei, lea ua fuafua foi lona fausiaina auā lava le saga faafaigofieina o femalagaiga a le atunuu i aso fai soo.
