Na molimauina le matuā faatumulia o le hall a le aoga tulagalua a Sutton Park School i le taeao o le Aso Faraile 12 o Setema i pule aoga a le Pasefika faapea nisi o faiaoga mai aoga taitasi aemaise o sui mai le ofisa o aoga sa auai e molimau le feiloaiga a faiaoga faapea fanau o loo aotauina i Sutton Park School ma le latou uluaoga fou le susuga ia Faatili Iosua Esera.
O mātua o fanau, o uo ma ē masani faapea le afioga i le faipule ia Su‘a William Sio sa faatasi uma atu i lenei faatasiga. Sa faatinoina nisi o vaega e pei ona iai tu ma le aganuu a tagata Maoli, ona sosoo lea ma siva faa-Maoli a le fanau.
O le tofa ia Su‘a Paogo sa fai ma sui o mātua ma le mamalu o faiaoga a Sutton Park School e faafeiloai i le auvalaaulia faapea le susuga ia Faatili Iosua Esera. A o le afioga ia Auvaa Unasa o le puleaoga a Mt Albert Primary School o ia foi o le peresetene o puleaoga a le Pasefika sa saunoa e fai ma sui o uluaoga a le Pasefika sa auai.
Sa saunoa foi le afioga i le faipule ia Su‘a William Sio e faaopoopo lava i saunoaga faafetai o le aso, ma usuina ai foi ma le pese, ‘Ua Faafetai, Ua Faafetai, Ua malie mata e Vaai’….O alo ma fanau Samoa o loo auai i le Bilingual Samoa sa latou saunia ni pesepesega faa-Samoa faatasi ai ma latou faafiafiaga.
Ae o se tasi o tina matua o Pasini Taukolo sa saunoa e fai ma sui o le Bilingual a Tonga e faafetai i le feiloaiga matagofie ma le puleaoga, faatasi ai ma le latou faafiafiaga na saunia lava e alo ma fanau mai Tonga.
Na faaiu polokalame o le aso i le saunoaga a le susuga ia Faatili Iosua Esera e faafetai ai i le mamalu o le atunuu ma le auvalaaulia na agai atu e molimau lenei faamoemoe tāua ma faaiu ai i le taualuga e pei ona masani ai tu ma le aganuu faa-Samoa.
O le susuga ia Faatili Iosua Esera na galue faafaiaoga muamua i Samoa i le kolisi o Leififi i le tausaga e 1978 i le 1979. O le tausaga lava lea 1979 na tuua ai Samoa ma malaga mai i Niu Sila nei, ma faiaoga i Turangi Primary School, ona sosoo ai lea ma le aoga a Taihape, ma see atu loa ma avea ma uluaoga a le aoga a Mangaweka i le 1986 i le 1990.
Sa toe galue foi i le puleaoga i Strathmore i Middlema i le 1991 i le 1997. Sa iai foi se tasi o aoga sa galue ai i le 1998 e oo atu i le 2005, ma o le tausaga lava lea sa toe avea ai ma puleaoga a Ueligitone seia oo mai i le taimi nei.
Ua sauni nei le susuga ia Faatili Iosua Esera ma le faletua e tuua Ueligitone ae malaga mai e galulue i le la aoga fou i Sutton Park School i Aukilani. O Faatili Iosua Esera o le uluai Samoa muamua lea na avea ma uluaoga i Niu Sila.
O le autu ma le faamoemoe ua malaga mai ai i luga nei e galulue ai ona o le faaaogāina o gagana e lua a tamaiti, ma o le mafuaaga foi lena ua filifilia ai lenei aoga ona o loo iai le Bilingual Samoa, Tonga ma Maoli, e faaaogā ai le tomai ma le iloa i gagana e lua e atinae ai le iloa o tamaiti ina ia lelei uma gagana e lua.
O se tasi foi o tamalii sa galue faafailautusi i le FAGASA talu ona faavae mai, sa avea foi ma peresetene o lenei faalapotopotoga, ma ia faavaeina ai se polokalame o vaiaso o le gagana Samoa lea ua toatele aoga ua latou faatāuaina.
O le vaitaimi foi lena sa amata ai tautalaga a fanau, ma le galulue faatasi ma le ofisa o aoga ina ia iai ni alaga‘oa mo le aoaoina o le gagana Samoa. O loo avea foi o se peresetene lagolago o puleaoga a le Pasefika.
