O mafutaga poo Reunion faaleaiga ua pau lea o le auala ua mafai ona fesootai ai aiga ma faamasani mātua ma fanau ma iloa ai le toatele o le auaiga o loo ta‘ape solo i atunuu eseese.
O le tagata ma lona faasinomaga o le tagata foi ma lona siosiomaga, o fanua ma laueleele ua aumai e le Atua e soifua ma ola ai. O lou aiga o lou tofi lea mai le Atua.
O le aano moni lea o le faamoemoe o le aiga Scanlan lea sa faataunuuina i le Aso Toonai ma le Aso Sa, o le toe mafuta faatasi lea o suli o Jeremiah Scanlan ma le tina ia Faatei Leiataatimu.
E toafitu alo na tupuga mai i nei mātua, o Salesa, Kalalaina, Kattie, Siaosi, Michael, Jeremiah Junior ma Williams. E toaono fanau sa mafai ona faataunuuina lenei faamoemoe ae sa lē mafai ona auai mai suli o Williams ona o tuatuagia.
E ui i timuga sa iai le faaiuga o le vaiaso ae sa lē tuua ai le fia mafuta ma feiloai o mātua ma fanau, ua aofaga potopoto le aiga Scanlan i le Malaeola Hall i aiga malaga mai Samoa lea sa auai mai ai le alii pule o le Samoa Shipping Corp ia Papalii Willie Nansan ma nisi o le aiga, o Amerika, Hawaii, Ireland, Fiti ma Niu Sila nei, ua patipatia ai le alofa ma le agalelei o le Atua ina ua faataunuuina ma le manuia le faamoemoe sa nofo tatalo ai.
O le agaga maualuga o le aiga i lenei polokalame ona ua faatasi mai ai le sui palemia o Niu Sila ia Bill English ma lona faletua ia Mary English. Ma sa molimauina le tupu ma ola o le aiga ina ua faataunuuina lenei faamoemoe. E tele atu a‘a o le tagata i a‘a o le laau.
O le Aso Toonai na amata i le resitalaina o igoa o aiga taitasi ona sosoo ai lea ma le sauniga lotu na saunia e se tasi o lupe faalele o le aiga ia Tuiavii Sefo Silipa o loo galue i le Ekalesia Nasareta i Panmure.
O le faamalositino mo le soifua maloloina na maua ai se malosi o nai tina ma tamā matutua faapea fanau sa auai, faatasi ai ma taaloga e faamasani ma fiafia ma mafuta ai tagata uma. Na taualuga polokalame o le Aso Toonai i le posiva e tata ai le DJ ma talatalanoa ma toe tomanatu ai i le amataga ma le faavae o le aiga Scanalan e pei ona tauasa mai ai mātua ua fai i lagi le folauga. O le Aso Sa na ositaulaga faatasi ai tagata uma e ala i le taulaga o le Misasa lea na taitaia e le afioga ia Patele Falaniko Stowers, ma sosoo ai ma le toonai na saunia e le mafutaga a le aiga Scanlan i Aukilani. O faafiafiaga na saunia e aiga taitasi na avea lea ma fetu pupula ma lamepa susulu e toe famautu ai le isi moemoe fou i le lumanai.
Na tapunia aloaia le Reunion o lenei tausaga i lauga faafetai e pei ona saunoa i ai nisi o tamā matutua o le aiga, ma tolaulauina ai le isi faamoemoe e faia i Samoa i le tausaga 2017 pe a fai le tuuaga lona tolu a le fanau.
O le susuga ia Lelilio Kalolo Scanlan sa fai ma fofoga o le polokalame o aso e lua, ma o ia foi o le Peresetene o le mafutaga Scanlan i Aukilani ae failautusi ai le susuga ia Tuilaepa Sefo Scanlan ma le teutupe o Muaiava Leiataatimu Scanlan, o le faufautua foi o le mafutaga.
Ma o le komiti foi lea sa nafa ma le tapenaga o le faamoemoe i nei aso e lua, faatasi ai ma le tutu malosi e faataunuu le Reunion i lenei tausaga. E ui o se uluai mafutaga lenei a le aiga ae sa faigata ona faamavae tagata ona ua telē se feau momoli mo aiga uma i lenei Reunion.
Ae o le komiti o le tuufaatasiga o Gafa o le aiga o loo iai Tricia Henderson, Ida Hunt Plumridge, Victoria Faatea, Nivemaria Scanlan, Rachael Ford Tapsell, Theresa Scanlan Haysom, Silaumua Levi Scanlan Tearii, Faasega Scanlan ma Fuifuifatu Bernie Pelenatete Tanuvasa.
