Feiloai le tamaitai loia ma se vaega o le mamalu o le atunuu i Brisbane

Ua logo tulu‘iga uma o le lalolagi i le mataupu o loo fālō ma fetosoa‘i faapa‘utolo a loi e pei ona taumafai i ai le tamaitai loia ia Leulua‘ialii Olinda Woodroffe ma faapea ona femalagaai ai i le va o Samoa, Ausetalia ma Niu Sila.
E le o toe po malaē ae atonu e sau se aso maua se tasi ma iu ai lenei taumafaiga. O lea fonotaga sa faataunuuina i le afiafi o le Aso Faraile, 4 o Oketopa i le hall a le aoga a Barimba i Woodridge.
O le taeao o le Aso Sa, aso 6 o Oketopa  na saunoa manino ai le tamaitai loia i luga o le leitio e momoli lona agaga faafetai ma faamanino le tulaga na oo i ai le faamoemoe  i lea  afiafi.
Na ia ta‘ua e lata i le 200 i latou na opogi ma auai i lea afiafi.
Na ia faamalosiau ma saunoa i le mamalu o le atunuu e alofagia o loo manaomia le tutū faatasi ma faia se sainigālima e opogi ai le faamoemoe e faatāua le gagana Samoa i lenei foi itu o iai le manaomia aemaise le taumafai o se vaega o tagata Samoa (Aiga Samoa i Logan City), e toe faafoi mai uarota Samoa auā nai alo ma fanau aemaise nai tuaa sinasina.
Saunoa a ia, e momoli le agaga faafetai i le afioga i le alii Palemia, Tuilaepa Sailele Malielegaoi e tusa ma le tusi aemaise o le fesoasoani, faapea faafeagaiga, taitai o mafutaga ma i latou uma na lagolago mai i le faamoemoe e pei ona malaga mai ai.
O le aoauli o le Aso Sa lava lea na toe taliu atu ai le tamaitai loia ma si ona alii i Niu Sila.