“Ua vava mamao nuu ma atunuu ua ola ai augatupulaga o lo matou aiga, ae tāua le feiloai e maua ai pea le fealofani ma iloa e fanau tagata o le aiga”…Tavai Meni
O le tausaga e 2010 na uluai faia ai faatasiga poo le Reunion a le aiga o Tupuola Silupevaelei Tauiliili Yandall Meni, o A‘ufaga ma o ia o le toe tagata o loo soifua mai pea i le taimi nei, faapea se tasi o ona tausoga o se tina e alala i Niu Sila ae sa lē mafai ona auai i le faatasiga, ona o gasegase o le tino.
O le fā o augatupulaga na soifua ma fananau mai i le tamā matua o Tupuola Silupevaelei, faapea fanau a latou fanau sa auai i le faatasiga sa faia i le faaiuga o le vaiaso ua mavae atu nei, lea sa faamautu uma ai i le nofoaga o le Tofamamao i Leauvaa i le Aso Faraile, ae na masii le aiga i A‘ufaga i le Aso Toonai 4 o Oketopa 2014, mo se tasi o vaega tāua o le polokalame o le reunion, o le misasa paia, o le inu a le afioaga ma le taumafataga.
O le aso foi lea ua mafai ai e nisi na malaga mai Niu Sila, Ausetalia, Amerika, ma Amerika Samoa ona oo i le afioaga na tupuga mai ai o latou tuaa ma mātua, faasolo mai ai lava ia i latou o tupulaga talavou o le aiga i lenei taimi.
O le susuga Tavai Meni o se tasi o le komiti o tapenaga o le faamoemoe na ia faamatala le tāua tele o mafutaga faapenei a aiga, talu ai ona o nei aso ua toatele sui o le aiga ua aumau ma nonofo i atunuu i fafo, ma ua lē maua ai se feiloaiga ma sui o le aiga i Samoa.
“O soo se tagata lava e pei o le Isaraelu moni e susue lona faamalama ma silasila mai i le mea na ola a‘e ai mātua, aemaise o lona faasinomaga, ma o le faamoemoe autu lava lea o lenei mafutaga”.
“O le isi itu tāua o nei faatasiga e maua ai le fealofaniga o aiga aemaise ia iloa e fanau isi fanau ina ia aua ne‘i aliali mai le tulaga ua tupu i nisi aiga o le toe nonofo o ni soo toto ma ni soo ivi ma aano, ona e mafua i le vava mamao o atunuu ua nonofo ai ma ua lē maua ai se feiloaiga”.
O le molimau a le tusitala i faatasiga faapea, e ese le tāua mo tatou uma. O nei aso ua salalau suli o aiga ua nonofo vava mamao e lē pei o tausaga ua mavae sa nonofo faatasi lava pe sa mau lava i Samoa le toatele seia vaganā se vaega toaitiiti sa nonofo i fafo ma sa fai ma asiasi mai pea i Samoa ma feiloai ma aiga.
O nei aso ua ta‘i fia tausaga o nonofo nisi o le aiga i fafo, ma ua faigata foi ona femalagaa‘i ona o fuafuaga faaleaiga aemaise ua taugata tele le faatupega o ni malaga, le tasi o mafuaaga sili ona lē maua ai se fesootaiga a tagata o se aiga toatele.
O se luitau lea ua aumai e le susuga Tavai Meni mo isi foi aiga o le tatou atunuu, le tāua o le faia o ni mafutaga faapenei ina ia toe feiloai ai sui o le aiga ua matutua lava ma ua pulapula lā goto le soifua auā o nisi foi ua fai i lagi le folauga ae ua lē toe maua se feiloaiga ma isi vaega o le aiga.
