Feiloai fiafia aiga i le faamanatuina 21 o Pili Aliimuamua Pesi

O le viiga ma le faaneetaga i le Atua ina ua aulia mai e le alii o Pili Aliimuamua Pesi le atoaga o lona 21 tausaga o lona soifua. O le Aso Toonai ua mavae, o se aso na faia e le Atua e feiloai ai aiganalua, uo ma ē masani i le fale‘aiga o le Buffet King i Manukau e sii faatasi ai le taulaga o le viiga ma le faafetai i le Atua ona o nei tausaga e tele ua aulia e Pili i lona olaga talavou.

Na auai mai ai foi le tuaa o lona tina mai Samoa le tina ia Faafetai Mulitalo faapea le tina o lona tamā i Avondale ia Iuni Sio. O se mafutaga matagofie ma maualuga i le alofa o le Atua ona ua faamanatu le 21 o Pili ae ua mafai ona auai mai ai ona grandma ia e toalua.

Na molimauina le lelei ma le faamaoni o le Atua i le tulai ai o le taitai o le mafutaga o le tatalo mo Isaraelu le susuga ia Ben Taala Schmidt i le upu faauuina a le Atua auā lava le tapueina o le olaga talavou o le atalii, sa faapea foi ona faia ai ma le tatalo faapitoa ia te ia, e le susuga i le faafeagaiga ia Tilaulelei Kirifi.

Sa ofoofogia ma matagofie mea uma ina ua lagona le fofoga o le faautautaga ia Leulumoega le tofa ia Malae Misa o lē sa faasoasoani i le polokalame o le aso. Na sosoo ai ma le feulaina o le keke ma le foaiina o lana Ki e lona tuua ia Saofaiga Aliimuamua Pesi.

O le tumutumuga ma le sini autu o le aso o le molimau a le tina, na ia toe alagaina ai le faafetai i le Atua ona o lona alo sa iai ni ma‘i na maua ai, ae o le alofa ma le faamalologa a le Atua ua vaaia ai ona vavega i le tuputupu a‘e o si ona alo ma leai atu ai ma ni ma‘i, na ia talitonu ai ma lona loto atoa e iai galuega a le Atua e aogā ai Pili. Na tuuina le ki i lona atalii ma lona lototele o le ki, o se faailoga e loka ma faamautuina ai pea lona loto naunau i le Atua. O Pili ua faauu mai lona tusipasi i le Aoga Tusi Paia i Fiti, ma o loo faigaluega nei i le kamupani o le Adept Ltd ma fesoasoani ai i lona aiga.

O loo faaaogāina foi lona olaga talavou i totonu o lana Ekalesia o le AOG i le autalavou. O le faafetai a le atalii na ia momoli lea i ona mātua ma lona aiga atoa ona o le tatalo ma le tausiga o lona ola ua mafai ai ona ia ausia tausaga faamanatu o se tama poo se teine talavou.

O upu taumavae na toe fetalai i ai le fofoga o le aso ia Malae Misa ma faafetaia ai susuga i faafeagaiga sa auai ma tina matutua aemaise o aiganalua, o uo ma ē masani sa molimauina ma patipatia le atoaga o le 21 tausaga o le soifuaga o Pili.

Pili ma ona tuaa faatasi ai ma lona aiga sa auai i le faamanatuina o lona aso soifua i le  Buffet King i Manukau