Feiloai Faasinoti a Aukilani i Saute ma le latou Pule Autalavou

O le mae‘a ai o le koneferenisi aoao a le Ekalesia Metotisi Samoa ia Iulai i lenei tausaga na lauina ai ma le tusi tofiga i tovine ma isi vaega o le galuega a le Atua e galulue ai lana aufaigaluega.

O le Aso Toonai la o le vaiaso ua mavae 20 o Setema na momoli aloaia mai ai le susuga ia Laupepa Fili ma lona faletua ia Gardenia Fili e o la aiga mai Samoa e faataunuu le valaau a le Atua e avea ma pule autalavou i totonu o Niu Sila nei i le faasinoti a Aukilani i Saute.
O lenei faamoemoe na faataunuuina lea i le maota o le matagaluega a le ekalesia Metotisi i Manukau i le nofoaga o loo alala ai le Sea o le faasinoti le susuga ia Masunu Utumapu ma le faletua ia Senerita Utumapu.

Na auai uma aiganalua mai Samoa o le susuga i le faafeagaiga ia Laupepa Fili ma lona faletua faapea foi nisi o la aiga o loo nonofo i Niu Sila nei. O susuga i faafeagaiga ma o latou faletua faapea ma sui o ekalesia taitasi o lenei faasinoti na potopoto uma ane lava e faafeiloai le uluai taunuu mai o le latou pule autalavou.

O nisi o matagaluega o le faasinoti a Aukilani i Matu sa mafuta mai ai foi i lenei faatasiga ona o le fia soosoo tau‘au lava ma le galulue faatasi ma isi o ona uso ia Keriso. O le Sui fofoga fetalai o le malo o Samoa le Tofa ia Agafili Patisela Eteuati Tolovaa na malaga mai ai foi i lenei aumalaga ona o lona lagolago ma le titi faitama i lo laua alo, le faletua ia Gardenia ua valaauina i lenei galuega a le Atua.
O le afioga i le Sea ia Rev Masunu Utumapu na taitaia le sauniga e amata ai le polokalame a o le faafeagaiga ia Rev Taeao Matua o le tausi matagaluega a Papatoetoe na saunia le tatalo faafetai.

O upu timai ma le faamalosi a le taitai i le pule autalavou ma lona faletua, “Ia fai Oe ma Au ma Tautai, ma ia manatua o le faiva e tapuaia e a‘e ma le manuia, aemaise ia maua le galulue faatasi ma ia toaga e tatalo”.
Na mae‘a le lotu ona sosoo lea ma le usu faaaloalo a le faasinoti i le faigamalaga e pei ona masani ai feiloaiga o le aganuu faa-Samoa. O faaaloaloga na tu tootoo ai le afioga ia Fuimaono Poloma e fai ma sui o aiga na lua auā le afioga i le Sea ma le faasinoti a Aukilani i Saute ma faaiu ai i le taumafataga na saunia e matagalueag taitasi.

O le susuga ia Laupepa Fili ma lona faletua ia Gardenia Fili e tofia e pule autalavou i Aukilani i Saute o loo galulue i le ofisa tutotonu o le ekalesia Metotisi i Samoa mo le lima tausaga. Ua amata nei le la galuega fou ma le faamoemoe i le faatasi mai o le Agaga o le Atua e manuia ai lo la valaauina.
Sui o aiga o le susuga i le faafeagaiga ia Rev Laupepa ma le faletua ia Gardenia

Taimi o le ‘ava o le feiloaiga

Tofa Agafili Patisela Eteuati Tolovaa (Sui fofoga fetalai o Samoa), faletua ia Gardenia Fili ma Rev Laupepa Fili