E foliga mai o le setete o Kuiniselani ua molimauina le manaia i fa‘aili e paau mai ma faafiafia ai ona e lē gata e laufofoga fiafia tagata uma, ae faamasani foi ma limafoai i malaga asiasi mai Samoa ma soo se atunuu.
E ui lava i le malulu o le tau, peitai e susue a le faamalama o le tagata ma tepa ane i lona aiga ma le nuu, ma opogi se faamoemoe. O le taunuu mai foi o le fa‘aili logologoā mai Sini ua lauiloa i le igoa “Liua le Vai o Sina” mai Faleaseela, sa lei nofoai foi le toatele o le atunuu i Brisbane auā fai mai le mau e talitonu a Toma ina ua vaai. O le aave mai o tala i le logomālie o siufofoga o le aufa‘aili, lea na aami aloaia ai e se tasi o kalapu i Brisbane o le Suavai o le Alofa se‘i faatafe atu i ai le punāvai o le alofa ma faatepa i le uiga moni o le igoa o le kalapu. O le tala moni, e pei e uso tuofe le kalapu ma le fa‘aili e ala i le tai uiga tutusa o la igoa ae mautinoa e iai le sootaga ia i latou, o le ala foi lea na matuai faatumulia ai le faamoemoe e ala i le galulue faatasi. Na matuai faamalieina le aumaimoa ma le ausisiva ae sili ai le kalapu ma le fa‘aili i le latou seleni na maua.
Toatele nisi mai le alalafaga o Faleaseela Lefaga faapea foi Sataoa sa faia Siva Samoa ma fesoasoani malosi e lagolago le faamoemoe i lea afiafi. Na toe taliu le aufa‘aili i nuu ma alalafaga i Niu Sa Uelese i le Aso Sa na sosoo ai.
O le taitai fa‘aili – Patrick Niko; Manager – Mase Semi; Failautusi – Andrew Liu Chan. O le aufa‘aili – Tony Lo-Tam; Avea Matelili; Lee Poa Liu Chan; Malifa Ah Chee; Keith Niko ma Michael Peni Tafā.
O fofoga o le po o Salilo Uiki mai le kalapu a le Suavai o le Alofa ae vaavaalua ma Saofai Vaatele Faavesi.
