Destanee Aiava ma Serena Williams ile Margaret Court Arena i Melepone - Photo: AP/Mark Baker

Destanee Aiava ma Serena Williams ile Margaret Court Arena i Melepone – Photo: AP/Mark Baker

Ole vaiaso na tea nei na feiloai ai Destanee Aiava ma Serena Williams ao loma le amataga ole Australian Open.

Sa faatonuina lea feiloaiga e le Tennis Australia e faalauiloa ai le taamilosaga taua i Melbourne, Victoria. I lea feiloaiga sa taaalo faataitai ai Destanee ma Serena, o se tamaitai  sa vaai maualuga iai Destanee ma avea foi ma faataitaiga ia te ia na mafua ai ona fiafia e taalo tenisi.

Ole taimi muamua lenei o lea taalo ai se tamaitai Samoa i taaloga a le tenisi ua taua ole Grand Slam.

O taaloga ia e iai le Australian Open, French Open, Wimbledon ma le US Open. O ia foi ose tamaitai pito sili ona talavou ua oo ai i lea tulaga ile na‘o le 16 o ona tausaga.

E faalima ona manumalo Williams ile Australian Open, o ia foi na avea ma numera tasi ile lalolagi ile tele o tausaga.

Na taua e Serena Williams, na lagona lona faagaeetia ile la feiloaiga ma Destanee. Ole isi itu na faaalia ai le fiafia o Serena, ona o ia na avea ma faataitaiga ia Destanee ma anau ai le taleni taalo tenisi a le tamaitai talavou.

Na amata taalo tenisi Serena ae e lei atoa le tolu o ona tausaga. Ole taimi foi lea na faatau ai e lona tama o Richard Williams, o lana faiaoga foi lea e oo mai ile taimi nei, lana pate tenisi muamua.

Ole ituaiga lea ole Wilson Racquet, ole kamupani foi lea na tali malo ile feiloaiga a Williams ma Aiava ile vaiaso na tea nei.

Ao se mitamitaga foi lea ile tamaitai talavou ole maua ole avanoa e feiloai ai ia Serena. Fai mai a ia, e faataitai lana taaloa ia Serena. O Serena foi na moe miti iai o ia ao laititi, ia tutusa ma pei o Serena Williams lana taalo.

Ile talanoa a Aiava ma le autusitala, na ia taua ai ole lima o ona tausaga na matamata ai ile taaloga a Serena Williams.

Ole taimi foi lea na fai ai o ia i ona matua o Mark ma Rosie, ole tenisi o lana taaloga lea e taalo ai pea matua o ia.

O lea la ua taunuu ile ofi ai o ia ile taamilosaga faapitoa a le lalolagi, le Australian Open, i totonu ole nuu na fanau ai o Melepone. Ao lea foi ua feiloai ai ma Serena Williams i totonu o lona nuu na fanau ai

Ole taaloga muamua a Destanee o lea taalo ai ma le Siamani o Mona Barthel. E 10 tausaga e va ai le toalua lea. Ae fai foi lava si maualuga tele ole tulaga o Barthel ile lalolagi ile tulaga 150 ile tulaga 270 a Destanee Aiava.

Ua leva ona taalo Barthel faapolofesa, ma na oo le maualuga o lana taumafai ile numera 26 ile lalolagi. Ole 270 ole maualuga lea ua ausia e Destanee, ae na iai o ia ile tulaga 388 ile faaiuga ole 2016.

O lea lua ai ia Destanee tamaitai Samoa ile tenisi polofesa a tamaitai.

Ole tasi o Steffi Carruthers mai Samoa lava. O lona tulaga ile lalolagi ole 979, ao le maualuga na ausia e Carruthers ole tulaga 662.

E matua faamoemoeina e le tenisi a Ausetalia le tamaitai talavou.

Ole taimi nei e numera ono lona tulaga ile tenisi a tamaitai i Ausetalia. E iai le faamoemoe o lea oo le taalo a Destanee i se tulaga maualuga ile lalolagi, i se taimi oi luma.

O lana faiaoga o lona lava tina o Rosie Aiava. Na taua e Rosie ua sauni ma tapena atoatoa iai Destanee mo lana taaloga amata ile Grand Slam a tamaitai 2017. O lea leai foi se taumate Destanee pe faapefea ona taalo i lana taaloga ma Barthel, ae o lea faatonutonu lelei ona mafaufauga ile taimi ole taaloga.

Ole isi lea tulaga e tutusa ai Destanee Aiava ma Serena Williams, o a la faiaoga o la matua lava. O Serena o lana faiaoga o lona tama o Richard Williams, ao Destanee o lana faiaoga o lona tina o Rosie Williams.

O lea tuuina atu ile vaiaso fou le ripoti atoa ole taaloga muamua a Destanee ile Australian Open.