O le mataaga lauiloa le To Sua, na agai iai maimoaga a Turisi ina ua fefefe e malaga i Savaii

O le mataaga lauiloa le To Sua, na agai iai maimoaga a Turisi ina ua fefefe e malaga i Savaii

E fetaui lava le taunuu o le aumalaga a tamaitai e toalima mai Niu Sila sa fuafua e asia Savaii i le vaiaso talu ai, ma le salalau mai o faamatalaga ma ata taufaamata’u mai Savaii. O iina lava na faamuta ai ma le fiafia o ia tamaitai e molimauina tala aave atu o le matagofie o Salafai ae o le tausaafia o ona tagata.  Na talanoa le tamaitai na ta’ita’ia mai le aumalaga lea mo Savaii, o se tulaga faanoanoa lava, ona o ia e alu soo i Savaii, ae sa taumafai lava e faamaonia i tamaitai Niu Sila nei ana faamatalaga i le matagofie o Savaii, aemaise o le tele o le niu Samoa mao’i o loo maua i Savaii, e suamalie ma lololo o latou aano.

Peitai ua avea le aafia ai o tala ave o Savaii, ma mafuaaga e tafafafo ai tulisi nei i le motu o Upolu, pei ona asiasi atu ai i le mataaga matagofie, le To Sua i Lotofaga. 

Ma latou molimauina foi le matagofie o Falealili ma ona tagata lea e faamemelo iai Samoa mai anamua e oo mai, ma fia Falealili ai fua le isi Savaii e lei oo lava i Falealili.

Toe foi tulisi i Niu Sila

O le faaiuga o le vaiaso na toe malaga ai tamaitai e toalua o le toalima o tulisi mai Niu Sila, ae o totoe ai isi tamaitai e toalua ma le tama e toatasi, o faamoemoe e toe foi uma lava i le vaiaso nei.  Na talanoa le ta’ita’i o lea aumalaga, e le na’o le faaletonu na tupu mai Salelologa na matafefefe ai tulisi i Samoa. Na latou maua foi le faamatalaga i le suauu na aafia ai le vaitafe o Fuluasou, ma tafe atu i le toga togo ma le sami.

Ae o le isi lea vaitafe sa iai le fuafuaga a le taitai malaga e ave iai tulisi e taeele ai, ma latou iloa ai le ituaiga o siosiomaga matagofie o auvai ma togatogo o Samoa, ae na vave lava foi ona kolosi ese na mataaga faanatura ma le latou lisi. O le suauu lea na po atoa o tafe ma molimauina e aiga i luga o le auvai, e oo mai i le aso, e lē o iloa lava poo fea na afua mai ai.

Talu ai e malama ane le taeao, ua toe mamā tafega ae o loo iila lava autafa na to’a atu iai le kiso.   Ma e oo mai i le taimi o le tatou lipoti lenei, e leai nisi taufaamata’u i tulisi na lipotia.