Fefe i le Komesina o Leoleo

Le alii leoleo o Dave Tomasi
Le alii leoleo o Dave Tomasi

Ua tele lava faamatalaga ua laga i le unai a le Komesina o Leoleo o iai nei, Fuiavailiili Egon Keil e faamalosia galuega o puipuiga i le atunuu. Ua lē ‘asa le masina ma osofaiga ua faia ina ia aveese ai fualaau faasāina i Samoa nei atoa ai ma laau malosi.

Ua tele foi galuega ina ia tafi ese amio piopio o loo vaavaaia i totonu o le Matagaluega o Leoleo, ae atonu o lea ua fesiligia nei lona tulaga taitai i se mataupu ua tagi ai nei se tasi o leoleo o le Matagaluega ma ua oo lava i le Toomaga mo ē Puapuagatia, le Komesina o Sulufaiga poo le ofisa o Aiā Tatau a tagata ma le Palemia talosaga a lenei alii mo se fesoasoani.

“O le taimi lenei ua lagona lo‘u fefe ona o le afaina ai o la‘u galuega,” o se faamatalaga lea a le alii leoleo o Dave Tomasi, ua lima tausaga o galue faaleoleo ma o le tausaga na tea nei na see ane ai mai i ona tiute i auaunaga lautele a le matagaluega i le vaega o taavale afi.

Ua mafua lenei popole ona talu mai Aukuso o le tausaga na tea nei, ua faasā lenei alii ona toe galue i le ala tele, e faatonutonu taavale e pei ona sa galue ai. Ua faasā foi ona ia toe faatautaia suesuega i ni faalavelave tau taavale e tulai mai. Faaalia e lenei alii o le masina lea o Aukuso, na ia taofia ai le taavale a le Komesina o Leoleo ona ua sese le nofoaga na tu ai, ma o le lapataia o le Komesina i lea tulaga ua matuā aafia ai lava i lana galuega faaleoleo.

Ta‘ua e Tomasi, o ia ma se isi leoleo na tiute i lalo o le uati i luma ane o le faletusi o Nelesoni i le aso lea i le pisi o le alatele ma le tau faatonutonuga o taavale feoai i lea taeao o le aso 15 o Aukuso.

Na ia vaai ane i le itu i gatai i luma o le Faletupe o Atinae, o loo ua iai taavale ua tutū i nofoaga o loo ua faatulafonoina na o taavale la‘upasese e afea ma tuu ai a latou pasese pea avatu ai a latou pasese, ae talu ai le tumu o taavale ese ua paka pe tutū ai i lea nofoaga na mafua ai loa ona oo i se itu ua poloka uma le alatele ae ua tutū taavale la‘upasese i le ogatotonu o le auala ma tuu ai a latou pasese pe piki ai foi pasese.

O lea na savali mai ai loa ma faagasolo le feoaiga a taavale ona ua uumi laina o taavale ua faigata ai ma femalagaaiga o le alatele.

Ta‘ua e Tomasi na ia taofia se isi taavale o se pikiapu ma ave i ai le pepa e sala ai poo le ticket, ae e fai lea tulaga ae faalogo atu lava i tagata i totonu o taavale o loo laina ma faatali e minoi agai i luma, o faapea ane, pe faafefea la le taavale a le Komesina o Leoleo ma le vaai atu e sese foi le nofoaga lea e tu ai le taavale a le taitai o le Matagaluega.

Faaalia e Tomasi, o lona manatu i lea taimi e tatau lava ona faia le galuega faaleoleo aemaise o se faataitaiga lelei lea i le atunuu o loo vaavaai atu ia te ia ma le faatinoga o lana galuega. Na agai i ai le alii leoleo ma fautuaina le alii Komesina i le sese o le nofoaga o loo paka ai lana taavale ae fesili ane i ai pe ua faamalosia e leoleo tulafono o le alatele ae o le LTA le pulega o fela‘uaiga i le eleele e vaaia le auala. O le tali a Tomasi o le galuega lea o loo faia e i latou o le faamalosia o tulafono o luga o le alatele. Na ta‘ua e Tomasi le toe fesili ane o le Komesina o Leoleo pe o ona iloa o ia o le Komesina o Leoleo ma e lei tali le alii leoleo ae ua faapea ane lona taitai e toe fetaui i se taimi.

O le aso lava lea i le tusa ma le 3pm i le afiafi, ae toe afe ane le taavale a le Komesina o Leoleo i le nofoaga lea e i lalo o le uati ua foi i ai Tomasi mo le faagasologa o ona tiute i lea aso ma o iina na ta‘ua e lea alii leoleo na toe fesiligia ai lona igoa e le Komesina o Leoleo, ua palauvale ane ia te ia ma tau alu atu i fafo e faaoolima ia te ia.

“E lei iai ma sa‘u tali i ai ma ua mae‘a le fa‘alo i ai ae fai mai loa lana sauniga ae ua na o lo‘u tu lava,” o le tala lea a le alii leoleo. “Na ou matuā faanoanoa lava ona o lo‘u lava manatu, o le taitai o leoleo ua alu soo i luga o le TV ma folafola e leai se isi e i luga atu o le tulafono, ma o se alii foi ua malosi lona finau mo leoleo i faamaoni ae o lea ua fai la‘u galuega ae ua ita ai ia te au”.

Talu mai lea taimi na ta‘ua e Tomasi, ua agai i le ofisa o le Komesina o Leoleo ma faatootuli ia e lona taitai i le vaega o taavale afi ma le faamatalaga e tatau pea ona faatoese i le Komesina. Uma le tootuli ae alu ane ma le faatonuga ua faasā ona toe alu i ni tiute i luga o le alatele ma ua lē toe faatagaina ona ia e feagai ma ni suesuega tau i faalavelave o taavale afi. Ta‘ua e le alii leoleo o lea ua faitau masina o faia lenei tulaga ma na o le usu atu lava saini le api o galuega o le aso ma tapena le ofisa pau lea o lana galuega. E lei mamao atu nei la, ae oo atu ni samania e tulai ai i luma o suesuega a leoleo lava ia, ua faapea ona molia ai o ia i ni mataupu i ni faitioga i luga o le alatele a o tiute ai i luga o le auala.

Ta‘ua e lenei alii o le isi tuua‘iga o lona tuu avanoa i se tamaitai na ia taofia ona o le talanoa i le telefoni a o aveave, ae o le isi tuua‘iga faapea ua ia taumafai e ole se isi foi tamaitai i totonu o lana taavale, e matuā lē faamaonia ma ua fiu e fesili poo fea le tamaitai na faitio ae fai ane leoleo suesue, ua malaga i fafo lea tamaitai.

Faaalia e lenei alii ua mafua uma lava nei faiga i lona talitonuga ona o le ita o le Komesina o Leoleo ia te ia ma ua taumafai nei ni faiga e faatulai ese ia o ia mai i le matagaluega o Leoleo. O le mau a lenei alii, e mafai ona alu ese i le taimi lenei ona ua lē iloa tonu lava poo le ā le agai i luma o ana taumafaiga o se leoleo i lea ofisa. Ae ua manatu e faalauiloa lona lē fiafia ona o lana aiā tatau e galue ma tautua ai i le atunuu ua ia manatu, o lea ua aveese ona o le manatu o le Komesina sa lē tatau lava ona ia taofia o ia i luga o le auala tele.

O le tali na avane e le Palemia ma leofisa o Aiā Tatau faaletagata, onosai ma faatalitali pe o le ā se faaiuga e iu ina faia e le Komesina ia te ia.