Ua iai nei se polokalame o loo faagasolo i lenei vaiaso auā le vaavaai i le galuega faafaiaoga i aoga tulagalua.
O le faanaunautaiga i le matagaluega o aoga e eseese le silafia ma metotia o loo faaaogā e faiaoga, ma o le mafuaaga lea ua aumai ai faiaoga mai le isi aoga e tufa atu i faiaoga i isi aoga ina ia fesoasoani ai i le aoaoina o le fanau aoga.
O le taimi muamua lea ua faatautaia ai lenei polokalame a le matagaluega, ma o se polokalame ua matuā talisapaia e faiaoga ma puleaoga.
Faaalia e le puleaoga o le aoga tulagalua tuma‘oti o le Samoa Primary, o se auala tāua tele lenei ua mafai ai ona faasoa faiaoga i auala e mafai ona saga faaleleia ai le tali atu i fanau ma o latou manaoga i totonu o le potu aoga.
E tusa ma le to‘a 20 faiaoga mai aoga e 10 a le malo o loo auai mai i lenei polokalame. Ua avea foi lenei polokalame ma auala e toe faamanatu ai nisi o taiala ma faamoemoega a le aoga lava lenei auā se lumanai manuia o tama ma teine laiti o loo aoaoina ai.
Faaalia e le sui o le Matagaluega o Aoga ua taitaia le faatautaiga o lenei taumafaiga, o Mutaaga Isara, o le filifilia o faiaoga o le talafatai o le taulaga e agai i isi faleaoga i lea lava vaega o le atunuu, ua amata ai le taumafaiga e vaavaai poo le ā le finagalo o faiaoga i auala e saga faaleleia ai le latou auaunaga aemaise o le vaavaai i le latou foi sao i isi aoga ia ua agai i ai.
O se auala ua unai ai foi le vaavaai i galuega e mafai ona faasoa ai faiaoga nei ma ia manatu ai o aoga tulagalua uma lava a le atunuu e tatau ona i ai le latou fesootaiga ma ia taumafai ai e faaleleia aoaoga a fanau uma ae ua lē faapito ia latou lava aoga lea tautua.
E lima aso o le a faia ai lenei fetufaaiga ma e na o le pau ai foi lea mo lenei tausaga seia aulia le tausaga fou.
