Tina matutua ole Aualofa sa latou feulaina le keke ole aso fanau

Tina matutua ole Aualofa sa latou feulaina le keke ole aso fanau

Ole galuega faatino a tina i totonu o ekalesia, ose galuega oloo maitauina ai lo latou foi sao e fesoasoani e atiae ai le galuega ale Atua aemaise foi o fanau teine talavou e tapena ai lo latou lumanai aua le isi laasaga fou ole olaga pe a oo atu ile olaga fai aiga.

Ose tasi lea galuega faatino ma le saili malo ale mafutaga a tina ale Aualofa Tamaki Tolu ile Tamaki Stake, e pei ona faatino ile afiafi ole Aso Toonai ua mavae 25 o Mati ile malumalu ole Ekalesia a Iesu Keriso ole Aupaia o Aso e Gata ai i Dawson i Otara.

O lenei faamoemoe sa vaevaeina ai le mafutaga a tina i vaega e tolu ma faaigoaina i lanu taitasi e pei ole lanumoli, viole, ma le lanu meamata.

Ma o nei vaega uma sa mafai ona faailoa ai le tomai ma le poto o tina ile kukaina lea o meaai e pei o keke faaipoipo, o kuki, o pai, o keke saina ma isi lava meaai taumafa ae le gata i lea ole taoina lea poo le faavelaina lea o keke ile umi e tatau ona tao ai.

O tina e silia ile 65 tausaga agai i luga ile 80 tausaga oloo mafai ona taulamua i lenei polokalame faatasi ai ma tina laiti faapea tupulaga talavou teine oloo mafai foi ona faasoa iai le malamalama o tina ina ia mafai ona latou faaauauina lenei taleni aua foi so latou lumanai manuia.

Ua talafeauga lelei le faamanatuina ole 175 tausaga talu ona faavae le Aualofa ale Ekalesia Mamona e pei ona faamanatuina ile lalolagi atoa ma le polokalame lenei a tina ma ua avea ai ose avanoa lelei e faailoa ai le taleni ma le meaalofa mai le Atua ma le patipatia o nei tausaga e tele ua faaopoopoina i totonu ole ekalesia. Ole faletua ia Alaifaiva Lemoe Futi, Sister Lagaia faapea nisi o fanau aoga e toalua, faatasi ai ma Bishop Taviuni Lemafa, sa latou faamasinoina lenei polokalame.

Tina ole lanu moli ile latou gaseseina o keke ma pai

Tina ole lanu moli ile latou gaseseina o keke ma pai

Au ole lanumeamata sa latou gaseseina foi nisi o keke

Au ole lanumeamata sa latou gaseseina foi nisi o keke

Ma ose taumafaiga sa iloga ona maitauina ele auvalaaulia ma le mamalu ole Aualofa a Tamaki Tolu le maualuga ole tomai ma le iloa ua oo iai le malamalama o tina ile faatinoaina o nei taumafa. Ma ua faasoa ai foi le faletua ia Alaifaiva Lemoe Futi sa avea ma faamasino o lenei tauvaga ile matagofie o tapenaga ma sauniuniga a tina i vaega taitasi, ma ole Inailau lava latou a tina e au i soo se tiute ma galuega fai i totonu o nuu, ekalesia ma aiga.

Na sosoo ma le feulaina ole keke ole atoaga ole 175 tausaga ole ekalesia e nisi o tina matutua ole Aualofa Tamaki Tolu ma faaauau ai polokalame ile taumafataga. Ole aoga ale New Zealand Institute of Technical Training sa latou lagolagoina lenei faamoemoe lea sa latou tauaaoina ai Ipu e fā auā vaega taitasi ole Aualofa.

Pei ona ta‘ua ele afioga ile Peresetene o lenei Aualofa le faletua ia Soa Figota e fā vaiaso na talanoaina ai lenei faamoemoe ma sauni ai loa tina e faatinoina le gaseseina o nei taumafa e pei ona silasila iai le mamalu ole auvalaaulia faapea faamasino ole polokalame. E le gata la i nisi nei o meaai taumafa ae oloo faatinoina foi e tina nisi o galuega taulima faapea nisi o kuka eseese, ma e vaevaeina lava taimi e faataunuuina ai nei polokalame taitasi.

Ile saoasaoa ma le maualuga ole poto ma le malamalama o tina ole Aualofa Tamaki Tolu i Tamaki, ole poto lea oloo mafai ona fefaasoaa‘i ma fetufaai mai nisi o tina i totonu ole Aualofa, e pei ona faatinoina i Aso Lua uma o vaiaso muamua o masina taitasi lea oloo faatamaoaiga ai tina uma.

E eseese lava tina ma a latou taleni ile kukaina o meaai, faapea foi i galuega taulima. O nisi e lelei ile paluina ole keke ma le taoina ole keke, o nisi e popoto ile kukaina o taumafa mamafa e pei ole sapasui ma isi ituaiga kuka, ma o nei vaaiga eseese uma oloo mafai ona tuufaatasia ai le tino ole Aualofa poo le mafutaga a tina ma faafesoaai ai lagona ina ia mafai ona tofusia ma faatamaoaiga ai tagata lautele.

Ma ua iai le lagona ole isi vaega tupe tele lea mo le lelei o aiga ma ekalesia pe a maua le poto lea ile gaseseina o taumafa auā le manuia o aiga nuu ma ekalesia. Ua faaitiitia ai foi tupe alu i faatauga o nei meaai taumafa ae oloo i o tatou lava lima le tamaoaiga. Ma o lenei faamoemoe oloo mafai ona faatauina lava i tausaga taitasi.

Susuga i Faamasino ole tauvaga

Susuga i Faamasino ole tauvaga

Comments

comments