Ole saofaiga ale Palemene ile nofoaga fou o faafoe ai nei ana fonotaga ile faletaalo i Tuanaimato

Ole saofaiga ale Palemene ile nofoaga fou o faafoe ai nei ana fonotaga ile faletaalo i Tuanaimato

Ole to’a 18 o faipule ole faigamalo ale HRPP latou te lei lagolagoina le tofia ai o lana afioga ia Tuimalealiifano e fai ma Ao ole Malo o Samoa.

I taualumaga ole palota ma saunoaga e filifili ai le Ao ole Malo mo le isi nofoaiga lima tausaga ua amatalia nei, na maua ane ai e na’o le 23 faipule ole HRPP na palota mo le Afioga ia Tuimalealiifano mai le 47 o faipule ole faigamalo ale HRPP oloo faamauina, ua fesiligia ai nei le faamaoni ma le alagatatau ai ona faatino pe faataunuuina o lenei faiga filifiliga, ae lei atoa uma faipule ole faigamalo, latou te palotaina le Ao ole Malo, tainane le iai ole latou taitai, e nate faafoefoeina ma faatonutonu taualumaga uma.

O fesili ogaoga oloo tulai mai nei:

1: O fea o iai finagalo o isi faipule e toaono ole HRPP?

2: Ae pe ana faapea e iai lena toaono, o ai e palota iai?

3: Ae pe afai e latou te lagolagoina uma le 18 o isi faipule na palota mo le Afioga ile Tui Atua, o lona uiga e ono 24 ai le afioga ile Tui Atua, ile 23 a Tuimalealiifano?

Ae ui i ia mau lagona ma manatu faaalia ole atunuu, e oo lava ise vaega o faipule ole HRPP, na saunoa le tasi oi latou nei, e malo lava le polokiki. Ole polokiki lava lea na faateia ai le Afioga ile Tui Atua i tala ua pa atu, ua lē toe filifilia o ia mo le isi lima tausaga o lumanai.

E mulimuli ane tusi atu iai le taitai ole malo, ae ua faitau aso talu ona taatia le latou filifiliga. Ole filifilia ai ole Afioga Tuimalealiifano Vaaletoa Sualauvi II ose tasi foi lea laasaga i luma ole taitaiga a lea foi tamalii iloga ole atunuu i lona nuu ma lona itumalo, ae o lana tautua faaauau ai pea mo Samoa.

Ua pale mai ai nei o ia ile lona 3 o nofoaiga, e pei ona faasolo mai ai ile nofoaiga nofo lua muamua, ale Afioga ia Tupua Tamasese Meaole ma le Susuga ile Malietoa Tanumafili II.

Ole mavae ai ole nofoaiga lena na faaauau mai ele Susuga ile Malietoa, na muta atu ai foi ma le tuuoti ole tofiga Ao ole Malo o Samoa. Ae sosoo mai ai loa ma le nofoaiga lona lua e lana Afioga ile Tui Atua Tupua Tamasese Efi, ile faapalota lea ole tofi mo le tailima tausaga.

Ua mavae ana nofoaiga sosoo e lua, ae pa’ū ai nei loa ile palota ina ua toatele le HRPP latou te lagolagoina le faia ose suiga fou.

Ole taimi muamua foi lea ua lē faia ai sea sauniga faapitoa ale malo, i lona malae fono i Tiafau, ole malae ole faautugatagi a Samoa, e malu ai ana tama.

Peitai na molimauina le matagofie ole sauniga ole faatautoga o lana Afioga ile Tofi, na faataunuuina lea ile faletaalo ole malo i Tuanaimato, lea oloo faafoe mai ai fono ale Palemene mo le taimi nei, a’o fausia lona maota fono fou i Tiafau Mulinuu.

Ma lagolagoina e taitai ole malo, e aofia ai le afioga ile Palemia, o lana Kapeneta, ole matagaluega ale Faamasinoga ma malo mai fafo. Na ia tauto ai ole a ia faia ma le tonu ona tiute ma le faamaoni…

Ole Faamasino Sili, afioga Patu Tiavaasue Falefatu Sapolu na gafa ma le faatautoga, ae silamio le atunuu, ma aiga, ae o lana Afioga ile Tui Atua Tupua Tamasese Efi ma le Masiofo ia Filifilia Tamasese.

Comments

comments