E toatasi le tagata ole pasese na maliu ae manunu‘a le toa sefuluono e toatele i fanau aoga ina ua oso i tua ose vaega ole alatele i Tiavi le pasi ale Laumosooi na faafoe ele alii avepasi o Faasaomotaeao Tausagi.
Na alu le ifoga ale aiga ole avepasi ile aiga o lē na maliu ae e lei alu ai lē ua molia. E oo foi ia i latou na manunu‘a e lei faia iai se faatoesega ele avepasi.
Ose itu lea e lei maua ai se ‘ai lelei o Faasaomotaeao ile silasila ale faamasinoga mo se isi faamamaavega mo sona faasalaga faafalepuipui. Ole alii avepasi ua faasala ile 4 tausaga ma le 3 masina ile falepuipui ma ua faasā foi ona toe tago ise foeuli ose taavale mo le valu tausaga.
O Iuni ole tausaga ua mavae na tupu ai le faalavelave ile vaega ole aualatele i Tiavi ina ia sopoia ele pasi na ave e lē ua nofosala se isi pasi sa tu ise pioga ole alatele. Ole mafuaaga lea na oso ai i tua ma le auala maua le alavai ma faasasao atu ai ma mafuli ise togavao.
Ole pasi na matuā malepe ma salalautasi ae faafetaia le alofa ole Atua ona e ui e faapea na manunu‘a tigaina nisi ae mitimiti manu‘a o nisi ole pasese e toa 36 ae e toatasi na fano lona soifua.
Ole faaiuga ale afioga ile tamaitai faamasino o Mata Tuatagaloa ua ave ai le fautuaga ile pulega o feoaiga i luga ole laueleele le Land Transport Authority ma tagata e ana pisinisi pasi la‘upasese ina toe iloilo lelei aiaiga ole tulafono e mafai ai ona umia ese tagata se laisene avepasi.
Ose iloiloga e tatau ona matuā vailiili lelei ai vaega e moomia ona aoaoina ai le avepasi ile saogalemu ole faafoeina ole pasi ma ia saogalemu ai ma le soifua o tagata malaga i pasi.
Ose fautuaga lenei ale faamasinoga na faafofoga iai le avepasi o Faasaomotaeao ao lau lona faasalaga. Na toe faailoa e le tamaitai faamasino nisi o faalavelave i pasi lau pasese na maumau ai foi soifua o nisi ae manunu‘a tigaina nisi.
Le pasi na tafea ile malosi o tafega i Savaii, ma le pasi na lavea i Solosolo lea e toatolu le au maliliu. Na faafoe e Faasaomotaeao le pasi ua uma le aogā o lona laisene avetaavale la‘upasese.
Ole isi lea faanoanoaga ole faamasinoga ona sa silafia lelei e le avepasi sa le tatau ona ia tago ile foeuli ole pasi semanu e le tupu le faalavelave.
Na tutulu le alii avepasi a‘o faamavae atu isi ona toalua ma ona aiga ina ua mae‘a ona lau lona faasalaga. Sa ioe o ia i moliaga ole fasioti tagata pa‘ivalea, avetaavale matautia ua manunu‘a ai ni tagata ma le avetaavale e leai se laisene.
