E lē o solomuli le Tautua Samoa i le ave o lana fautuaga i le Palemia ma le Malo e tusa ai o le faaseā na ave faasaga i lipoti a le tusitala o John Campbell. “A tatou vaai nei i ai e na o le toatasi le tagata lea e taulamua i le faaseā na ave ua na o le Palemia, ae o le a alu ai tupe a le atunuu atoa. E sili pe a faataatia ae faamuamua galuega mo le manuia o tagata uma”.
O le finagalo lea o le afioga Aeau Peniamina Leavaiseeta, le sui taitai o le Tautua Samoa e tali atu ai i se faamoemoe o le Malo e toe apili le faaiuga ua teena ai le faaseā a le Malo faasaga i ni lipoti a le alii tusitala o John Campbell a le TV3 a Niu Sila. Sa faaseā le Malo ona o lipoti a Campbell na fesiligia ai poo fea ua alu i ai le selau miliona ma ona tupu o tupe o fesoasoani o le sunami, ae o loo iai aiga ma tagata na aafia e lē o atoatoa pea vaega manaomia mo lo latou soifua lelei. E lē toe tau faamatalaina le malosi o le tali atu a le Palemia ma le Malo i ia lipoti sa matuā teena ai le faaaogā faaletatau e le Malo o ni seleni na aumai i fesoasoani.
Na oo ai lava ni vaega o finagalo faaalia o le alii Palemia i lea taimi na masua mai ai i fafo lipoti a Campbell i lona lu‘iina o le alii tusitala ma lana au pueata ina ia latou malaga i nuu na aafia e faailoa i ai mea na alu ai tupe.
O loo tumau pea ona lagolagoina e le vaega faaupufai o le Tautua Samoa lipoti a lea alii tusitala mai Niu Sila. Na faaalia e le taitai o le Tautua Samoa le afioga Palusalue Faapo II, e ao i le Palemia ona faamalamalama mai poo ā uma galuega na faaaogā i ai tupe. O lana mau e lei faaaogā sese e le Malo seleni na aumai, ae o lona talitonuga sa ave i isi galuega e pei o le fausia o taligalu ma auala tetele auā tapenaga o le palota ua mae‘a a le atunuu. “E ao i le Palemia ona tausisia pulega lelei ma ia faamanino mai vaega uma sa alu ai seleni nei”.
Ua mae‘a ona tali le taitai o le Malo i vaega nei ua toe lalaga mai e le taitai fou o le Tautua Samoa ina ua faato‘ā alia‘e lipoti a Campbell. Sa faailoa ai e le Palemia le lisi o galuega uma na alu ai seleni, ma le eseesega o le aofaiga o tupe na maua mai fesoasoani o le sunami ma seleni na ta‘ua i lea lipoti. O le taimi nei e pei ona faaalia e se ofisa sinia o le Malo e lei uma ona aumai fesoasoani o le sunami sa ofo mai e atunuu ma faalapotopotoga i fafo. O le teena e le pulega o faasalalauga a Niu Sila o le faaseā a le Malo i lipoti a Campbell ua faailoa mai ai e le Loia Sili a le Malo, le lē taliaina e le Malo o le faaiuga ua taunuu i ai le pulega o faasalalauga a lea atunuu.
O le itu o loo tuliloaina i le faaiuga o le lē mafai lea ona silasila o le pulega i le tulaga paleni, fetaui ma le sagatonu atoatoa o le lipoti poo le accuracy. O le mafuaaga lea o le toe iai o se lagona o le Malo e tapenapena mo le faia o se apili e ave i le Faamasinoga Maualuga a Niu Sila. Ua faaalia e le Loia Sili le afioga Aumua Ming Leung Wai, le ilitata o se lagona o le Malo i le taunuuga o lana faaseā, o le mafuaaga lea o se tapenaga faapea o loo silasila i ai i le taimi nei.
O le faalua lea ona ave faaseā a le Malo o Samoa i le pulega o faasalalauga a Niu Sila. O le faaseā muamua na manumalo ai le mau a le Malo faasaga i le lē talafeagai o se lipoti a se tamaitai tusitala o le Televise a Niu Sila (TVNZ) na faailoa ai le avea o Samoa ma nofoaga e faaulufale i ai laau malosi e faasā faaletulafono ma faia ai fefaatauaiga o fualaau faasāina.
O le lua o faaseā i se lipoti foi a se isi tusitala o se isi faletelevise a lea atunuu le alii o John Campbell ua aumai le faaiuga ua faigata ona talia ina ua teena ma lē talia e le pulega o faasalalauga le BSA le faasea a le malo o Samoa.
