Ua mae‘a le galuega ale Komisi suesue o faigapalota sa sailia ai finagalo ole atunuu i nisi auala e saga faaleleia atili ai faigapalota ale atunuu pe a sailia tofi faipule o Itumalo ile Palemene.
Ole vaiaso ua mavae na tauaao atu ai le lipoti ale komisi suesue ile afioga ile Palemia Susuga Tuilaepa L Sailele Malielegaoi. O nai sailiiliga ile fia maua ose faamatalaga ile taunuuga o galuega ale komisi o palota, na faailoa mai ai ese molimau faatuatuaina e tele fautuaga ale komisi ua folasia ile latou lipoti. O nisi o fautuaga e pei ona faaalia ele molimau, ole faamalosia lea ole faia o palota a tagata palota ua lesitala poo le compulsory voting. O Ausetalia oloo iai lea aiaiga ole faamalosia ole faia ole palota ale tagata ua lesitala ma e faasala pe a lē alu e fai lana palota.
O aiaiga ole tulafono o palota a Samoa oloo iai nei, e faamalosia le lesitala ole tagata pe a aulia le 21 tausaga, ae a oo ile aso ole faigapalota e le faamalosia le alu e fai le palota. Peitai afai e talia ele Malo le fautuaga lea, o lona uiga ole a tutusa loa le faamalosia ole lesitala ole tagata ua tatau ona palota, ma le faamalosia foi ole alu e fai le palota.
Ose tasi o fautuaga e pei ona faailoa mai ele molimau ole vaevaeina o itumalo lea oloo fautuaina ele komisi le toe soloia o itumalo tu taulaga poo urban seats, ae vaevae loa le itumalo o Faleata ina ia lua tofi faipule o Sasae, lua faipule o Faleata i Sisifo, ae ole a aofia ai i totonu ma nuu e le oni nuu mavae ole itumalo.
Ose suiga foi ole a lē toe lavea ai Leauvaa ma Salamumu i itumalo i Savaii oloo aofia ai ile vaevaega o itumalo faaleaganuu oloo fua iai itumalo faafaipule oloo iai ile taimi nei. Ose isi fautuaga ale komisi ua faailoa lava ele molimau faatuatuaina, ole faia o transfer poo le liliuina ole lesitala ose suafa ose tagata palota mai le tasi itumalo ile isi itumalo. Oloo fautuaina ele komisi ia faamuta le faia o lea tulaga i totonu ole 12 masina poo le tausaga e tasi, a‘o lumanai le 12 masina e faia ai le palota tele.
O lona uiga e faatino le liliuina ose itumalo mo se tagata palota i totonu ole fa tausaga ole paeaiga oloo faagasolo ale Palemene, ae oo loa ile tausaga mulimuli a‘o lumanai le faigapalota taofia loa le toe faia ose liliuga poo se transfer. Oloo faalia ele komisi, ose faiga sili lea e taofia ai nisi gaioiga lē manuia ile faia ole liliuga ose itumalo e palota ai se tagata ae toe o nai masina faia le palota e sailia ai tofi faipule ole Palemene ole atunuu.
