O tagata logonoa poo i latou e faaletonu le faalogo e lē faigofie pe a taumafai atu e fesootai iai. E atili faigata pe afai e le gata ina faaletonu le faalogo ae e le mafai foi ona tautala ua na o le memumemu mai lona fofoga. Ua tatou iloa uma lea tulaga peafai o totonu ose aiga e iai se tagata faapea. O aso ua mavae e pei e fai ma mea malie i nisi pe a talanoa iai latou e logonoa ona seiloga e matua ee iai ma faatino ni tagata e faailoa atu i sea tagata se mea o loo manao nate iloa. Ua tatou iloa foi ma silafia o se tagata e logonoa e masalosalo tele lona loto pe a vaai mai ona fofoga o talie nisi ae nate leo lagona ni tala ona vaaia lea ua pei ua ita ma le fiafia.
O le taua lea o le vaiaso ua mavae atu nei i Samoa sa faataua ai e le SENESE ose faalapotopotoga ua latou faataua le aoaoina o tagata logonoa aua e iai o latou manaoga faapitoa. E talitonu ua tele nai tausaga talu ona oo i Samoa le au popoto ma atamamai ua maua le silafia e aoao ai tagata e logonoa ile gagana faitaga. O le gagana lava lea ua fesootai ai i latou, peitai mo tagata e lelei le faalogo ma le tautala e tatau foi ona latou aoaoina ma silafia le faaaogaina o lea gagana.
“Oute fautuaina malosi lava lo tatou atunuu e faatāua le gagana faitaga ia malamalama ma aoaoina ai auā ole a tutusa ai i tatou uma ma ē logonoa ma lē mafai ona tautatala i fesootaiga i soo se mea tatou te fesootai atu iai”. Ole saunoaga ale afioga ile Minisita lagolago le susuga Tofa Li’o Foleni, ole matagaluega o tina ma tamaitai sa faaiuina ai ma taualuga le vaiaso mole faatāua ole gagana faitaga.
Ole alii o Simon ose tasi o tama talavou oloo a‘oa‘oina ile SENESE ma o lana lea tautinoga na faia ile vaiaso ole gagana faitaga, ole fia avea ma faiaoga. Peitai na ia faamatala e tauau ina lē taunuu lana miti pe afai e leai se tāua ole gagana faitaga i mafaufau o tagata uma ona e fia fesootai ma fia maua sona silafia i mataupu oloo ia a‘oa‘oina.
Ose luitau lea ua ta‘ape le toatele sa auai i polokalame o lenei vaiaso auā ole augani ale alii o Simon talosia ia toe fai le isi vaiaso e faatāua ai ile tausaga fou, ua toatele nisi ua latou faaaogāina i totonu o auaunaga eseese e lē gata i pisinisi a‘o tautua ale Malo.
