Ua lauiloa le alii faifaleaitu logologoā o le Laughing Samoans ia Tofiga Fepuleai i la ata pupuu ma le mālie e uiga i tagata Samoa ma a latou amio felanulanuai ma le mate gata.
Ae o lana malaga mai i Sini mo le taaloga a Samoa ma Toga sa fesiligia ai e uiga i lenei
uiga faatigamata a tupulaga Samoa ma le Pasefika o le taupulepule fusuaga ma misa i nofoaga lautele ma fale faatali pasi ma nofoaafi. “E faanoanoa lava le vaaia o tatou fanau i nei misa ma vevesi pe a fua atu i le tu ma aga a Samoa o le faaaloalo lava le itu tāua o le soifuaga, auā e tatau ona e faaaloalo i le isi tagata, ona e maua ai foi lea o le faaaloalo mai ia te oe.”
“O tatou aiga lava e tatau ona fetausia‘i aemaise lava pe a iai se mataupu e feteena‘i ai, o le fofo lava o le talanoa ma faalelei ma tineia le faafitauli a o lei oo i se isi tulaga auā a leai, o mea nei e tilotilo i ai fanau ma latou tauaveina.”
“E oo lava foi i Samoa ua pei lava o tupulaga o loo soifua ane i Niu Sila, Ausetalia, ma Amerika, ua fiafia e faatupu misa.”
“O le itu lava e leaga ai nei misa o le lē talafeagai o numera o ē faatupuina pe osofaia se tasi poo nisi toalaiti ma e lē iloa ai se Toa o se isi. O isi taimi e na o le toatasi le tagata e fasitele e le toasefulufitu pe o se toalua e osofai e se toafāsefulu tagata.”
“E moomia tele le galulue pea o le komiuniti ma leoleo aemaise tupulaga e fofo ma tineia lenei uiga auā e faigata o loo tagofia e fanau le ava malosi ma fualaau faasāina ma nisi aaafiaga faalemafaufau.”
“Ua toatele foi soifua ua maimau i tu‘i tasi (king Hits) lea e faapo ai se tasi ma faaletonu ai ma o le taunuuga lenei e oo ai nei misa ma feeseeseaiga e lavea ai ma le mimita. O nai o tatou ekalesia foi e tele so latou sao i le fautuaina pea o nei uiga ia suia.”
“Ae o le amataga lava o lenei faama‘i o totonu lava o aiga. Ia te au ia na sasa a‘u e o‘u mātua ma ou te faafetai lava auā ua ou iloa ai le lelei ma le leaga ma ou te lagolagoina lea faiga e fua atu i se tulafono lea e faasāina ai le sasa o le fanau ae ia aua foi le soona tigaina tele.”
“Ma e amata lava le vaai a le tamaititi o pepe i mātua ma le lotoifale o le aiga faasolo atu ai ina matua ma aoaoina lelei i tulaga e talia ma vaega e taumamao ese mai ai, ona maua ai lea o se soifua toafilemu ma le tausaafia.”
