Ua patipatia ele Malo ma le atunuu i lenei tausaga le galuega fita oloo feagai ma alii ma tamaitai faiaoga i Samoa oloo galulue punouai ile aoaoina o fanau lalovaoa ale atunuu, amata mai i Aoga ale Malo, o Aoga a ekalesia, Aoga tumaoti, ma Aoga faapitoa faapea Aoga amata.
E tatou te ioe ma talitonu e le faigofie le galuega a faiaoga peitai ose galuega e tele foi ona luitau. Ole solo umi a faiaoga na taunuu i luma maota ole Malo ile eleele fou faatasi ai ma taavale teuteuina na tala’i ai le autu ole aso o faiaoga o lenei tausaga sa tapisa ai le taulaga o Apia ile taeao ole aso Tofi ua mavae.
Na manino le feau tuusa’o ale afioga ile Minisita o Aoga Taaloga ma Aganuu le afioga Loau Solamalemalo Keneti Sio i lana saunoaga autu e ao i faiaoga ona fesili ifo poo le ā se tāua o lenei aso mo i latou.
Na polili mai ai ma fautuaga ale Minisita ina ia silasila faiaoga ile faatinoga oo latou tiute tauave i aso uma ile aoaoina o fanau ale atunuu.
Ole polokalame ole aso na mae’a saunoaga autu e tatala ai ona sosoo ai lea ma faafiafiaga eseese sa saunia e fanau aoga lautogia faapea ma le au faafiafia masani a faiaoga. Na tauaao ai foi ma ipu o faailoga taualoa ma tusipasi mo nisi o faiaoga ua maualuga lo latou tomai aemaise ole tautua. Na amanaia ai foi nisi o faiaoga ua sinasina lauao ile galuega ma ua malolo litaea. Ole Minisita o Aoga na toe saunoa e taualuga le aso faailogaina o Faiaoga o Samoa ma le lalolagi atoa. O lana saunoaga lenei:
“Ole Aso ua tautupu, ole Asō foi ua maualuga auā o lea ua tigi tauao sā ma faigā i ona tulaga faalupea. Ua ee mai foi ponaoo o Samoa o ē sa molimauina le faamoemoe ole Matagaluega ile Asō e pei ona iai le faamanatuina ole aso mo faiaoga uma o Samoa ma le lalolagi atoa.”
“A’o lenei aso ma la tatou mafutaga, e lē tuua faapoevaga, pe ta’ape faatama auā ole agaga faafetai ma le loto ua malie ona ole tofā ua a’e ma le faautaga. Ua afifio ma tala mai ai aao, seanoa lo outou afifio mai, poo ua lē tu maualuga le taeao ma le Aso. Auā e ui ile taeao na atofa ma le Aso sa loma, e leai se tasi e taumāsina ma le finagalo ole Atua. Ae faafetai, ua tau mai lelei le igoaipu a Leuluaialii ae fetaiai ma uso le igoaipu a Tauiliili”.
“O lea ua tatou iai i si’ui o lo tatou faamoemoe ona faapea lea ose leo vaivai ole Matagaluega. Matou te avatu vaimālu i pu’ega, i sa outou silasila lē tau i lenei aso, ise aga ua lē tautamālii ma se leo ua pā’opapa, mālū ave i fale i so outou finagalo. E poto ā le tautai ae sese lana atu i ama. Ae tatou ‘ae‘ae ia lea manu ua ulu. Ua tau le ‘ai o Alae e pei o tala ile togialugaga nai Ᾱtua.”
“Ona faapea lea ose matou tala, afai ae tatala le filialii ma tuama le fua. Ona ou manatua lea ole upu ale Tusi Paia, ile fagatuaga a Iakopo ma le agelu, na faapea ane ai Iakopo”. “Oute lē tuua oe seia e faamanuia mai ia te au“. Ose lagona lena ole Matagaluega, se’i o outou faamanuia ile Matagaluega auā matou tiute ua tofia ma filifilia ai ele Atua i soo se ala.”
“Ia alofa mai le Atua pulepule tetele, lau Afioga ile tamā ole atunuu – Tuilaepa Dr. Sailele Malielegaoi. Ia saga utupūpū fulu ole sega ale Malietoa, lea sa pao ile Papaofo ma le Vaopipi, i lau tofā mai ile Atua. Maua foi se finagalo ole Palemene o Samoa auā ona upufai”.
“Alofagia le aufaitatalo poo feoi ole talalelei, oloo nōnōmanu ile Atua auā Samoa mo a taeao. Mamalu ole auvalaaulia ma ē ua potopoto, ia iai manuia ole Atua. Folau ia i lagimā, tapuai le Matagaluega ma le fiafia. Ia iai le agalelei ole Atua i soo se ala ole a uia i toe taimi o lenei Aso”.
