Fausia tulafono tuli ai i Samoa faasalaga o pagota

O le alii leoleo o le Malo o Samoa, susuga Misi Matamu o loo molia i Solomona ona o le faalavelave tau taavale na maliu ai se tamaitai aoga faatausi soifua (nurse trainee) o lea atunuu i le aso 13 o Iuni o le tausaga ua mavae, 2008.
O le mafuaaga lea o le naunau o le Malo e fausia se tulafono e mafai ai ona aumai le alii leoleo i Samoa e tuli ai sona faasalaga faafalepuipui pe afai o le faaiuga lea o lona moliaga o le ave taavale faatamala ua mafua ai ona maliu se tasi.
Na faaalia e le taitai o le Malo i le alii Palemia, susuga Tuilaepa L Sailele Malielegaoi, e le gata ina aoga mo lea malu o le Malo le tulafono, ae faapea foi mo isi tagatanuu o Samoa e faasala i le falepuipui i isi atunuu.
“O le ala lena na ou malaga ai ma feutagai ma le taitai (palemia) o lena foi Malo o Solomona, e malie i le maua va fealoaloai i le maua lava va, e aumai pea le tama e faafalepuipui iinei.
Ae faapena foi i lo tatou atunuu e tele foi le mau Solomona ia o loo aooga iinei ma omai i faigamalaga, pe tulai mai foi se solitulafono a se Solomona iinei fai se tatou faamasinoga faasala ai, ona talosaga lea o le alii pagota e ave ia i Solomona ona ave lea.
O se tulaga faigata tele lea aemaise lava le tatou tama lea na aafia”, na saunoa ai le Palemia i le Palemene.
Na saunoa foi Tuilaepa: ‘O le faigata ona o lea e leoleo i le vaega a le RAMSI, o leoleo a le Pasefika mo le tausia o le filemu i totonu o Solomona, lona uiga e ono afaina ai le tatou tama leoleo i le tele o ni pagota na ia lokaina i totonu o le falepuipui.
O le mea la lena na oo i ai mafaufauga, pe oo nei ina fai ane le faamasinoga ae faamaonia le solitulafono na ave onā e le alii leoleo le taavale. Ia o lea foi e malolo e le o faigaluega ia o le onā la lena ma le ave onā o le taavale na maliu ai le tamaitai lea i Solomona.
E aafia la i lalo o tulafono a Solomona e le mafai foi ona puipuia i lalo o tulaga foi sa galue ai ona o lea e lavea e le o galue i ona taimi o lea e tafaovale ma tupu ai le faaletonu lea’.
‘O lona uiga afai e sala ae ave e loka i le falepuipui i Solomona, e tilotilo mai le au Solomona lea na ia aveina faapagota, o le Samoa lea ua alu atu, o lona uiga e toe sue atu ua falai e le au Solomona i totonu o le falepuipui.
O le tulaga lena na tupu ae ai se manatu mo le puipuiga o lea alo o Samoa e tatau lona ona laa tatou aua ua ese foi le tulaga lea ua iai.
Ua taape o tatou tagata ua matua toatele o loo galulue i Fiti ua iai foi a tatou tamafanau i totonu o Vanuatu, ua toatele foi atunuu o le lalolagi o le tulaga o savali o le filemu a Malo Aufaatasi.
O tatou fanau e le o ni agelu nei tei ua asiasi i se faleava tutupu ai ni faalavelave, o isi foi o loo feoai i vaa.
‘A pasia la se tatou tulafono faapea ona faigofie lea ona fai faamasinoga, a sala aumai e tuli i le tatou falepuipui i Tafaigata’, na saunoa ai pea le alii Palemia.
Na faaalia e Tuilaepa i le Palemene, e maoae mea ua tutupu i falepuipui i fafo ua fasioti ai tagata ma o le tasi lea mafuaaga autu ua fausia ai lea tulafono.
O loo faagasolo nei le iloiloina o le tulafono e se komiti faapalemene, ona toe tuuina atu ai lea i le maota fono mo le lauliliuina o ona vaega taitasi ma pasia.