Ua folafola mai nei ele Polokalame Fesoasoani a Niu Sila (New Zealand Aid) lo latou faatupeina lea ose suiga e faia i lumāmaota ole malo ile elelee fou, ise foliga e avea ma nofoaga e faataunuu iai mea fai, ma o latou faia se auala savali matagofie mai le uati tele ile taulaga agai atu ile apitagalu.
Ole taimi nei oloo iai pea le auala savali sa faatauofo foi lona fauga ae ose auala na faasaili seleni ai. Sa totogi ai tupe a tagata latou te gafatia, le tau ole piliki ae tusi ai o latou igoa ma faai’u o aiga ma suafa matai o tagata a’o latou suafa muamua i luga o piliki ole auala savali o iai nei mai luma o Aggies agai atu i tua ole fale ole malo. Oloo soli ai ele au savavali o aso uma, ma molimauina le tele o igoa matafi, ma ‘afa’afa, lē atoatoa, ae ole lē iloa foi e isi ole uiga ua folasia ai le auala i ia suafa tāua.
Peitai ole taimi nei, lea foi ua amata le tusiga ole ata fou ele Huishou Municipality o Saina, ose paka faitele ile elele fou, i tua ane ole fale ole malo, ina ia ogatasi ma le fuafuaga ole taulaga fou ua folasia ai nei. Ile faalauiloaina o lena fuafuaga mai le tausaga talu ai, mo le suiga o foliga ole taulaga, na saunoa ai le Palemia, Tuilaepa Lupesolia Sailele Malielegaoi, ile avanoa e mafai ai ona suia foliga ole tatou taulaga, e avea ose nofoaga matagofie ma tele ona aogā.
O ata na poo ni miti ua ose avanoa tuuina mai e vaai ai faalemafaufau, ile mafai ai ona siitia ole tatou taulaga, ma faafoliga iai le tele o miti eseese, i vaega e fa ole talafatai o Apia ua mata’ituina mo nei suiga.
Na manino mai ai lava i lena saunoaga a le taitai ole malo, le tele o fuafuaga amata, ma le mata’ituina ole ata poo foliga vaaia ole taulaga, a’o lei tuua iai le tele o metotia lagalaga. Ole fuafuaga foi lenei ole taulaga fou, e sau faatasi lava ma ona galuegafai. Ma ua avatu ai foi le avanoa i tagata maumea e faafaigaluega ai a latou tupe, ae o faapaaga mo atinae, ina ia ma’oti mai lava le matafaioi ale vaega latou.
Ile talanoaga lava lea ale taitai ole malo na agiga ai le iai lea ole sootaga ole malo ma se faapaaga o mea tau atinae faapea, e faataunuuina le fausiaina ole talafatai, fua i manaoga ole ata e tuuina atu o lea faamoemoe.
Ole fuafuaga foi lea ile talanoa ale alii Palemia, ole a tele ni tagata e tali mai ai, ma faaauau ai lava le galuega fai faatasi, ina ia fausia lava se taulaga tu talafatai, e faatosina, sefe, tulaga ese mai ai lava ia, ma manatua pea e tagata faimalaga mai fafo.
Ole fuafuaga ole Poloketi lenei ole taulaga talafatai o Apia, ose galuega fai faatasi ale Matagaluega o ‘Oa Faanatura ma le Siosiomaga, e ala atu ile vaega o pulea galuega fuafua ma le taulaga, ole Ofisa o Tusi mo le atinaeina ole gataifale, ma oloo galulue faatasi ai ile taimi nei, ma isi matagaluega a le malo ae ole pulega o Tulisi. Ole talafatai e oo atu iai le ata lea, e aofia ai le Penisula i Mulinuu i Apia, ma le faasolo atu i Vaiala i Taumeasina. Ole vaai mamao, o lenei fuafuaga, ina ese mai ai lava lo tatou talafatai, e le gata ina matagofie, saogaleu, ma atagia atu ai itu tāua ole oo mai i Samoa e iloa ai.
Ole taulaga fou ole tatou sootaga
Ole isi itu tāua lea ua aumai nei i luga e le fuafuaga ole taulaga fou i Apia, ina ia faaauau ai pea le sootaga lea ole tagata ile sami, ma maua ai avanoa e faaaogā ai e tagata ole atunuu, ma avane ai a latou lagolago i avanoa faapisinisi.
O vaega e fā ole taulaga ole a toe faaleleia, e aofia ai le sau mai le talafatai o Mulinuu ile malae taaalo o Malaefatu i Sogi.
Le vaega lona lua, Apia Waterfront Central ole sau mai le talafatai ole maketi i Savalalo agai mai ile auala sima i Mulivai. Ma le Apia Waterfront Harbour, e sau mai le Beach Road agai mai ile Uafu i Matautu. Ae ole Vaiala Waterfront mai le Palolo Deep Reserve agai atu i Taumeasina. Ole fuafuaga o nei suiga ile Talafatai ole taulaga, ole a lima ta’ita’ina ai le agai i luma o atinae fai i foliga fou ole a iai, i totonu ole isi sefulu tausaga o lumanai poo le sili atu foi ina ia ogatasi ma le vaai mamao atu iai. Ua iai le faamoemoe ile talafatai lenei o Samoa e nate faatosina mai tagata, ma avea ose sootaga i isi atu vaega o Samoa.
Ole isi itu o loo mata’ituina ele fuafuaga ole taulaga fou lenei, ole saogalemu, ma le mamā, e le gata ai o tatou lava tagata ae o malo taunuu, ia fiafia. Ole siitia o foliga vaaia ole taulaga o Apia, e faaali atu ai le taulamua ai ole taulaga e faatumauina le avea ai ose nofoaga e taunuu mai ai tulisi poo tagata asiasi mai ile Pasefika, ma tatala atu ai foi avanoa i tagata e fia faafaigaluega mai a latou tupe i Samoa, ae ole a maua ai o avanoa faigaluega ma pisinisi.
