E toavalu ni tamaiti Samoa na pueina ma loka e leoleo i Cabramatta i le vaiaso talu ai ina ua osofai e se alii e sefuluvalu tausaga se alii leoleo.
Na lipotia mai e le Ofisa o Leoleo i Cabramatta o le vaiaso talu ai i le Aso Tofi, 19 o Mati na alu atu ai se asiasiga masani i autafa o le fale faatali nofoaafi i Cabramatta i le itula 4.10pm i le afiafi ae lafoai ane ai e se alii e 18 tausaga ni upu masoā ma palauvale i leoleo i le faatinoina o tiute.
Sa fautuaina e leoleo lenei alii e faamuta lana sauniga ae peitai na faifai tetele lana amio lē mafaufau ma taumafai ai loa leoleo e pue ma saisai, o le taimi lea na vaaia ai loa le osofai o leoleo e nei tupulaga se toavalu e aofia ai le tasi e na o le 13 tausaga o lona matua.
Na lipotia le faaoolima o nei tupulaga i le tatu‘iina o ulu o nai leoleo e aofia ai se leoleo tamaitai o loo faia lona tiute.
O molimau a nisi sa iai e laki nei tupulaga e lē o Amerika lea na tupu ai lenei faalavelave semanu o le tali lava a leoleo o le tafana uma o latou ma faaoo ai le oti e alii o malu o le Malo.
O loo faia nei suesuega a leoleo pe sa faasuaava ma onanā nei tupulaga pe sa aafia foi i ni fualaau faasāina poo le mimitavale lava ma le lē mafaufau. O loo taofia o latou suafa se‘i mae‘a o latou faamasinoga.
O lenei nofoaga na tupu ai le faalavelave pe tusa ma 15 minute mai le nofoaga o loo faia ai le Faaaliga Tele a Samoa i ana oloa faalauiloa mai Samoa mo tagata Ausetalia ma le Pasefika auā se alagatupe mo nai o tatou tagata faifaatoaga ma gaosi oloa.
O loo faatautaia e le Ofisa o le Konesula i Liverpool o loo saafi ai le Afioga Fonoti Manogiamanu Etuale Ioane i le aai tuaoi o Cabramatta lea na tulai mai ai lea vaaiga matagā mo si tatou atunuu pele i le agaga.
O lenei faalavelave ua taualuga ai nisi o lipoti a paaga a leitio Samoa iinei i tulaga vaaia pea o le malepe o amio taupulea a tama ma teine fanau a Samoa o loo soifua i Sini nei i totonu o nofoaga faitele e oo lava i potu aoga, faletusi (library) lea e gasolo ai tamaiti o isi atunuu e sailiili i le poto lautele (research) ae o atu fanau Samoa fai ai taaloga ma pisapisao ai ma faalavelave ai i isi tamaiti ma tagata o loo faaaogāina nei nofoaga e saili ai le poto salalau.
O loo faatalitali nei se lipoti a leoleo i suafa o i latou na faatinoina lenei tulaga ua tilotilo faasiasia ai nei le atunuu lautele i Sini Sisifo i nai tagata Pasefika ma Samoa i femalagaiga i pasi, nofoaafi aemaise nofoaga faitele ma avanoa faigaluega mo le toatele o saili galuega i lenei vaitau i Sini ma Ausetalia faatoa taunuu mai i Samoa ma Niu Sila e saili manuia mai.
