Fanua e fesootai ai ma le Atua

Ole taimi na sua ai le eleele e faapine ai le fanua ole a tau mai iai laina televave oloo faataoto mai ile sami
Ole taimi na sua ai le eleele e faapine ai le fanua ole a tau mai iai laina televave oloo faataoto mai ile sami

Ua faailoga aloaia ai nei le vaega ole fanua ole Kolisi o Samoa, ile tulimanu e afe ai le auala i Vaivase uta, ole a mapuna a‘e ai laina o fesootaiga televavave lea ua faamanuiaina ai Samoa.

Ile lauga ale faafeagaiga, Susuga Siolo Tauati na taitaia le sauniga e faailoa ma faapaia ai le fanua e taunuu iai le laina, submarine cable ile taimi e taunuu mai ai i Samoa, “ole fesootaiga ole puna lea e maua ai faamatalaga, le fesootaiga foi lea tatou te iloa ai ona saili fesoasoani mo tatou.”

Ole fesootaiga o tatou ma le Atua na aumai e Iesu, e mamā ma tauleleia e faaoo mai ai le finagalo ole Atua.

O fesootaiga ia e mamā ma amiotonu, e tauleleia le auala ua oo mai ai faamatalaga.

A‘o silamio lana afioaga ile Sui Palemia, Fiame Naomi Mataafa, ose vaega o Minisita ole Kapeneta, faipule ma faauluuluga o matagaluega ale malo, ae faasolosolo mai le feau ole taeao. Lauga Rev Tauati: “Ua tatou omai e molimauina taumafaiga ma le tofa ua a‘e, sogasoga, ma le faamoemoe ua taunuu. Ina ia faigofie ona fesootai atu, auala faigofie, ose auala e fanau mai ai se tamaoaiga e tua iai le atunuu.”

I lana molimau e iai le pa‘epa‘e ma le uliuli, ne‘i te‘i ua taotaomia le tāua matagofie o lenei faamoemoe, ne‘i faaaogā e nisi e fanau ma maua ai amio lē lelei, e mafai foi ona faaaogā e gaoi e nisi meatotino a isi, ae ose auala e tupu ai le vevesi.

E talitonu le auauna ale Atua, “ole faamoemoe lava ia o lenei atinae, e tatou te tua iai, na‘o mea lelei lava. E ala ona leaga, pe a faaaogā ele tagata e faamalie ai lona manao. Ua faia ia manuia ai le toatele o tagata, ma manuia ai ma le lalolagi atoa.

Ole afioga ile sui Palemia, Fiame Naomi Mataafa ina ua saunoa aloaia ile faailogaina o lenei matati‘a, na ia saunoa ai: “Tatou malamalama ole autu ose mea ole saunia lea ole eleele e faailo ai le taunuuga ole laina ole a tosoina mai ai tatou fesootaiga ma Fiti ma isi atunuu.”

E talitonu le tamaitai sui Palemia, “ose atinae oute lagona ose poutu ose faavae, faaletamaoaiga ile agai i luma ae o vaega eseese o auaunaga, e ala i fesootaiga televavave.”

Na ia uluai faafetaia ai le alofa ole Atua ina ua tapenaina lenei tamaoaiga tele mo Samoa. Na ia afea foi i lana lauga faafetai ile malo, paaga ua galulue faatasi ai nei ma Samoa, e pei ole faletupe ole lalolagi, ole faletupe o Asia ma le malo o Ausetalia.

Ose avanoa mo le agai i luma o atinae o tagata Samoa, o ana pisinisi aemaise o fefaatauaiga.

Na faafetaia foi ele Sui Palemia, le pule sili ole kamupani ale Southern Cross, Anthony Briscoe ile faapaaga ma Samoa.

Ole Southern Cross oloo faatautaia fesootaiga i laina i lalo ole sami, e fesootai ai Niu Sila ia Ausetalia ma le Pasefika, faapea Amerika, ma le agai atu i Fiti. Ua savalia ile tolu tausaga talu ona pulea e lea alii le Southern Cross ma ana galuega tetele.

Peitai ile timaiga ale faafeagaiga: “Ne‘i faaaogā e isi e faaleaga ai isi, faamoemoe e maua ai mea lelei. Ae ala ona leaga ole faaaogā ele isi e faamalie ai lona manao. Tatalo ia faapogisaina mafaufau e vevesi ai, ae ia faatupu ai se filemu. Ole fesootaiga lea o tatou ma le Atua.”