E ono vaiaso le faasalaga faafalepuipui o se tasi o tamalii o se tamā matua foi sa avea ma Faipule o le Palemene le afioga Toomalatai Lauvai, e mafua i le moliaga o lona lē usitaia o le faaiuga a le faamasinoga e faasino i ni mataupu tau eleele.
Na faatoa iloa e lona aiga le faaiuga ua nofosala o ia i le toese ma taumafai ai e saili se isi finagalo o le faamasinoga i le totogi tupe o le faasalaga i le falepuipui. O le talosaga a le aiga e mafua ona e iai gasegase o loo aafia ai le tamā matua aemaise ua matua foi lona soifua.
Na toe tuuina atu le mataupu lenei i le faamasinoga faaitumalo ma fofogaina i luma o le tamaitai faamasino na faia le faaiuga le afioga Mata Tuatagaloa. Peitai o le taunuuga o lea talosaga e lē mafai ma o le faaiuga lava e tumau e ono vaiaso e tuli ai le faasalaga o Toomatalai Lauvai II i le falepuipui i Tafaigata.
Sa fautuaina foi le aiga afai o iai se finagalo e finauina se suiga i le totogi tupe o le faasalaga faafalepuipui e na o le faamasinoga maualuga e mafai ona fofogaina ai.
O le Aso Faraile na tea nei na iloiloina ai e le afioga i le faamasino sinia o le faamasinoga maualuga, Lesatele Rapi Vaai, le talosaga a le aiga sa finauina e le latou loia le afioga Tuala Karanita Enari.
Sa tuuina atu ai ni lipoti faafomai o loo iai faamatalaga o gasegase o le tamā matua, ma ia silasila i ai le faamasinoga mo sana faatofāla‘iga e ala i se faaiuga. Na finau loia a le itu a leoleo, pe ana faapea e tuuina atu lipoti mai le falema‘i e tusa o aafiaga tau le soifua maloloina o le tamā matua, i le taimi na lauina ai le faaiuga i le faamasinoga faaitumalo, e lē suia ai lava le faasalaga o le falepuipui.
Sa lagolagoina lea mau a leoleo ona e faapea e lē o se taimi muamua lea ua molia ai lea tamalii i le lē usitaia o le finagalo o le faamasinoga. E iai foi nisi mataupu sa tulai ai lē ua molia i le faamasinoga ma faia i ai faaiuga.
O le ta o le 5pm i le afiafi o le Aso Faraile na tea nei na lauina ai le iuga o le talosaga ma ua lē talia. Ua mafua lea iuga ona e lē mafai ona suia le faaiuga ua mae‘a ona faia, ae seia vaganā se aiaiga o le tulafono faavae na faailoa e le afioga i le faamasino e mafai ai i le pule a le Ao o le Malo ona faia se poloaiga e suia ai se faasalaga faafalepuipui i le sala tupe.
Faaalia e le loia a le itu a leoleo sa finauina le tumau pea o le faasalaga falepuipui, o le aiā tatau lea a le itu na talosaga e sailiili ai mo lea folasaga a le faamasinoga. Ua savalia nei le tolu o vaiaso talu ona nofosala le afioga Toomalatai Lauvai i le falepuipui. Sa avea o ia ma faipule o le itumalo o Aleipata Itupa i Luga i se tasi o paeaiga a le Palemene ua mavae.
Faamatalaga na tuuina mai
