Falepuipui Manu Samoa Fautua Otto

Le alii lakapi o Fautua Otto
Le alii lakapi o Fautua Otto

Ua falepuipui i Egelani le sui ole Manu Samoa o Fautua Otto, ile solitulafono ole avetaavale a‘o seia lona laisene. E lima masina ole faasalaga. E faalua ona maua lenei alii ile aso lava e tasi a‘o seia lona laisene, ma faasāina o ia ona avetaavale. Fai mai ripoti ole masina o Tesema na molia ai i ana solitulafono. E lē gata ile taofia o ia ile falepuipui ae ua faamuta foi e lana kalapu lakapi Jersey Reds lana konekarate lakapi.

Ua faailoa mai le lē fiafia ole kalapu i amio a Fautua lea ua faasala ai o ia, ose amioga ua lē talafeagai ma tuutuuga o lana konekalate sa taalo ai mole kalapu. Na faailoa foi ele kalapu lo latou faanoanoaga, ona ole afaina ole kalapu ona ole faasalaga ua tuuina atu ia Otto.

Ole solitulafono a Fautua i faasalaga e pei ona ripotia nei, ua lē ogatasi lea ma tu ma aga ale kalapu auā o tama taalo, e avea i latou ma faataitaiga i tagata lautele.

I suesuega ale komiti faapitoa ale kalapu ua faamautuina ai male faaiuga ole a faamuta ai male konekarate a Fautua mai le Jersey Reds. Ua mae‘a foi ona faalauiloa faalauaitele ele kalapu le faaiuga ua faia, e ala ise faasilasilaga faalauaitele na sainia e Bill Dempsey, ole Faatonu ole Lakapi ale Jersey Reds.

Ole konekarate a Otto ile kalapu e 35,000 pauni ile tausaga.

O Fautua oto e 12 taaloga faitaulia na taalo ai mole Manu Samoa.