Faiva o tina fai mea lelei sa ō, sa ō, faalā lelei

Ua 12 tausaga talu ona faagasolo mai le polokalame a le Malo, o le toe lalagaina o le ie tosi ninii, o le ie Samoa mao‘i poo le ietoga. Ua 264 ie tosi ninii ua iai talu mai lea taimi umi o le polokalame, ae o lea aofaiga e na o le 180 ie numera tasi.

O lona uiga a faaauau pea le polokalame ma toaaga tina o fale lalaga e faatino pea o latou faiva alofilima e oo atu i le isi sefulu tausaga ua toe faateleina le ie tosi ninii ae mou ese atu ie tetele lapopoa ma uumi naua o loo vaaia pea i faalavelave fai a le atunuu.

O le sini lea o le faamoemoe o le Malo e pei ona saunoa le afioga i le Minisita o Tina ma Tamaitai, Atinae o Nuu ma Aga Fesootai o le sui taitaifono foi o le komiti o le ie Samoa le tofa Tolofuaivalelei Falemoe Leiataua, i le faalelega pepe o lenei tausaga, ua taualuga i ai galuega o lenei tausaga ua fetaui tonu ma le faamanatuina o le Aso o Tina o Samoa aemaise o lo latou Aso Sa faapitoa ua mae‘a atu nei.

O le autu o le saunoaga a le Minisita, o Tina o lo latou lava faiva o le fai mea lelei auā e tua i ai aiga ma nuu aemaise o le fanau i o latou faiva alofilima i galuega fai e pei o le lalagaina o le ie Samoa, gaosia o siapo ma mamanu i mamanu lava a Samoa, o le isi lea faamoemoe autu o le faalelega pepe o lenei tausaga.

O le molimau a le toatele sa auai i le faalelega pepe na faia i le Aso Faraile 8 o Me 2015 i luma maota o le Malo i le eleele fou, ua siitia le lelei o le lalagaina o le measina a le atunuu, auā ua vaaia le matagofie o le tosi, vaivai ma memea aemaise o le tausisia e fale lalaga o le fua a le Malo i le umi e tatau ona iai le ie.

O se toe vaaiga i tua i tausaga ua tuanai i le toe taumafai e faaolaola mai le ie mao‘i a Samoa, o le faalapotopotoga o tina faipisinisi a le atunuu le Samoa Women in Business na latou amatamea.

Na faaalia e le Afioga i le Palemia i se feiloaiga talu ai ma tusitala, o le faalapotopotoga lea na talosagaina le Malo i se lagolagosua i le latou faamoemoe, ma e lei talitualimaina e le Malo lo latou fanoga. O lea la ua vaaia nei le manuia o le polokalame.

O le polokalame foi o le ie Samoa ua mafai ona toe gaosia ai le siapo auā tasi lea oloa a Samoa sa tele ina faaaogā i taimi o faalavelave ma isi sauniga masani e lē misia ona faaaogā ai. Peitai e toatele sa latou molimauina i tausaga ua mavae, ua lē toe vaaia ona ua toaitiiti lava se vaega o tina sa latou faatumau le gaosiga o le siapo, auā sa faatau ma maua ai seleni.

O le taimi nei talu ona toe faamalosia le gaosiga o lea oloa ma se measina a le atunuu, ua tele ina toe vaaia siapo i faaaloaloga a le Malo i taimi o Sisigafu‘a, ae o loo vaaia foi i nisi o sauniga ma faalavelave o nuu ma aiga, e ui ina molimauina o siapo mai Tonga o loo faaaogā e nisi.

Pe afai o le a faatumau ai pea lenei polokalame, e mavae atu nei augatupulaga ae tulai mai nisi augatupulaga o le atunuu o le lumanai, o loo latou faaauau le matagofie o le ie Samoa le maniti o tamalii ma siapo i mamanu Samoa moni.

O nisi ia o vaaiga i le faalelega pepe o ie Samoa tosi ninii poo le tosi tasi o le polokalame a le Malo ua toe lalaga mai ai le ie Samoa mao‘i. O galuega nei a Matuauu ma le Ausee papa i fale lalaga e fia i Upolu ma Savaii ua taualuga a latou galuega i le faalauiloa o a latou galuega alofilima, ua fetaui lelei ma le faamanatuina o le Aso o Tina o Samoa o lenei tausaga 2015