“E faamuamua e le Tautua Samoa le soifua lelei o tagata”… Palusalue Faapo II
O puipuiga o le saogalemu o le uafu faapea vaa laupasese o le Malo, o le mafuaaga lea na lē toe faaaogāina ai le uafu i Satitoa i Aleipata i le masina o Fepuari.
“O le fia puipui o le vaa ma le uafu o ni meatotino tāua a le Malo na taofia ai malaga a le Lady Naomi mai Satitoa agai i Tutuila”.
O le faamatalaga lea mai se alii ofisa o le Faalapotopotoga o Vaa a Samoa ina ua tapa se faamatalaga mai lea totino o le Malo o loo feagai ma malaga a vaa i le va o Satitoa ma Tutuila i Amerika Samoa.
Na mafua ona faia le sailiga mo se faamatalaga a le Faalapotopotoga o Vaa a Samoa ona na faaalia e le sui taitai o le Tautua Samoa le afioga Palusalue Faapo II, ua lē toe faaaogāina le uafu i Satitoa.
“Ua fai mai nei le HRPP o le a toe fau nisi uafu, ae o le tatou uafu foi i Satitoa e lei leva ona tatala ma faaaogā, ua lē toe faaaogāina”, na saunoa ai Palusalue.
O le amataga o Fepuari 2011 na taofia ai malaga a le Lady Naomi mai Satitoa ona o tulaga louloua o le tau e pei ona faaalia e le alii ofisa o le Faalapotopotoga o Vaa ua lē faailoaina lona suafa.
Ua faailoa mai foi e lea tagata faigaluega, o le masina fou o le a toe foi ai malaga a le Lady Naomi i Satitoa. O le feiloaiga a le Tautua Samoa ma le vasega o tusitala na faaalia ai e le sui taitai ia Palusalue, o le toe folafola mai e le HRPP o le toe fausia o nisi uafu e lē o se fuafuaga talafeagai, ona o loo iai le uafu i Asau ae lē o faaaogāina, faapea foi le uafu i Satitoa na faato‘ā umusa ma amata tatala i le tausaga na tea nei.
Na ia faitioina foi le folafola mai e le taitai o le HRPP, Susuga Tuilaepa L Sailele Malielegaoi o le fausia o se malaevaalele i Aleipata.
“O le a faapefea ona fai mai e fau se isi malae vaalele i lea vaega o le atunuu, ae e tele mauga i Aleipata ma e lamatia le saogalemu o tagata malaga”.
“O loo iai le malae vaalele i Fagalii na tapuni ae na toe tatala, ma e na o le 20 minute e lele ai i Tutuila, o le a faapefea la ona toe fau se isi atina‘e faapea i Aleipata, ae o fea o le a faaaogā i ai Fagalii?”
O le faalauiloaina o le anavatau o le HRPP na faaalia ai e Tuilaepa o nisi ia o fuafuaga alualu mamao a lana faigamalo pe a toe filifilia, i le naunautaiga e saga siitia le tautua mo le atina‘e o tagata tafafao, o se isi lea o lima taumatau o le Malo i tupe maua.
Talu ona tulai mai le HRPP, o le atina‘e lea na ave i ai le faamuamua i lona faatuina, ma e lē gata ina fausia ia lelei malaevaalele ma uafu ina ia faigofie femalagaiga a tagata turisi ma le atunuu lautele, ae o le atina‘e o faletalimalo e nonofo ma faamautu i ai tagata tafafao.
