Faitioina ele atunuu le Samoa Observer

Gatoaitele Savea Sano Malifa
Gatoaitele Savea Sano Malifa

Ua alu le Aso Sa male Aso Gafua o gasolo mai faitioga ale toatele ole atunuu ona ole lomia ele nusipepa ole Samoa Observer i lana lomiga ole Aso Sa na tea nei 19/6/2016, o le ata o se faafafine oloo iai masalosaloga na pule i lona soifua. Ose ata e foliga mai na aumai ele nusipepa mai i luga ole upega tafailagi ale Facebook.

Ole faalavelave lea na maliu ai lea alii elē o iai se lipoti mai ile ofisa o leoleo ile taimi lenei peitai ua faatoese le pule ole nusipepa ma lana faamatalaga e lei iai lava se manatu e faaleaga se tasi pe faia se lipoti e afaina ai finagalo ole atunuu.

Faaalia foi e Gatoaitele Savea Sano Malifa, o lea na alu le ata lenei i luga ole facebook ae ole tali ale toatele i lea saunoaga, ole facebook ole filifiliga lava ale tagata e agai ai i ia upega tafailagi elē pei o nusipepa e agai atu lava oloo faalauiloa mai i nofoaga eseese e pei o faleoloa.

E oo lava ile Palemia ole atunuu ua faalauiloa lona lē fiafia tele i lenei lipoti male ata o lea talavou. Faaalia ele susuga Tuilaepa Fatialofa Auelua Lupesoliai Sailele Malielegaoi, ole mafuaaga tonu lava lea ole unai ale Malo ina ia faatu se fono e lima taitaina ai galuega a nusipepa ma ofisa faasalalau ma faamalosia ai tulaga maualuga o a latou galuega.

Ua pasia le tulafono mo se fono lenei ofisa faasalalau ma nusipepa ae oloo talia le tofiga ose fono ele asosi a tusitala lea faatoa tofia lona laulau fou.

Faaalia ele Peresetene ole Asosi o Tusitala i Samoa, le JAWS le tofa ia Apulu Lance Polu, e malamalama lava ile tulaga e pei ona saunoa iai Gatoaitele ae ua aafia lava le galuega faatusitala i ituaiga lipoti male faaaogā o ata faapea, ona ua foliga mai ua leai se silasila i aafiaga o i latou e faitau ma maimoa foi ile ata ua faalauiloa ole faafafine ile taimi tonu na maua atu ai ua maliu.

Ua tele le mau faamatalaga ua lalau ai le leai ose tofa male leai ose manatu i lagona o tagata ua aafia i lenei lipoti. E lei iai se finagalo ole aiga o Jeanine lē ua maliu e faasoa i sui o ofisa faasalalau ma tusitala i lenei mataupu ae na ta‘ua ele asosi a Faafafine i Samoa le faanoanoa tele i lenei faiga ale nusipepa.

Faaalia e Gatoaitele, ole ata lenei na tuufaatasi male lipoti o feeseeseaiga o Ekalesia lotu i Samoa i lenei vaitaimi, ma ole faaiuga e tuu le ata i luma ole pepa ona ole manatu e iai se feau tāua oloo fesootai ai ma feeseeseaiga nei a Ekalesia lotu.

Ae ua atili ai le lē fiafia o nisi ona ole fesootaiga ole maliu o lea faafafine talavou male nofoaga na maua ai lona tino maliu ile hall poo le maota ole Ekalesia Katoliko i Taufusi, ose nofoaga e gasolo iai le toatele mo taaloga ole BINGO o sailigatupe ia a lea Ekalesia e faia i vaiaso taitasi.

Faaalia ele Faatonu Sili ole Samoa Observer e lei iai lava sona manatu ole a oo i lea tulaga le ma‘ema‘eā ole atunuu ma e ese foi le mafuaaga na ia faia ai lea faaiuga ma na toe faamaualalo lava le afioga Gatoaitele Savea ile aafia ai o finagalo ole atunuu faapea le toatele mai i fafo i lenei lipoti male ata ua faailoa ai le maliu o Jeanine Tuivaiki.