E lei avea le toaitiiti ole Ekalesia Living Word Christian Center i Papatoetoe e faavaivaia ai lana talimalo ile semina ole Faith Explosion. Ta’ua ele susuga ile faafeagaiga ia Elia Sipaia, o lenei mataupu ole faatuatua ose mea oloo manaomia tele e ia ma le Ekalesia, e le gata ina ia ou iloa ile mafaufau ae ia ou ola ai ma faatino.
Na ia taua foi “E na ole to’afitu aiga ole matou Ekalesia sa o matou tuuina atu lenei semina ile Atua ma le faatuatua e taunuu e pei ona vaaia le matagofie ole Atua ilenei tolu Aso o aoaoga faalefaatuatua.”
Ta’ua foi e le susuga ile faafeagaiga ia Elia, “E silia ile sefulu afe tala le tauaofai ole faatupeina o lenei faamoemoe. E lei faamoemoe ile malosi ole tagata le faatupeina o lenei aoaoga, ae na muamua le faatuatua ile Atua, faatasi ai ma o matou galuega e ala ile sefuluai ma taulaga, lea ua faamanuia ai le Atua i loto oi matou nei faatasi ai ma le mamalu na mafai ona auai mai.”
Ose lasaga maualuga na ausia i lenei aoaoga e tusa ma tautinoga a nisi sa maua le avanoa e auai atu ai, e pei ona o latou molimauina le tele ole sosia ole Atua na mafai ona faasoa ai ana auauna i lea tolu aso.
Na ta’ua e se tasi o alii sa totogiina mo le pueina o ata ole semina le susuga Sione Hopoate, “O a’u na ou sau oute pu’eata ae peitai ua avea ma avanoa oute faalogo ai ile Afioga ale Atua, ua faamatalaina ise laasaga maualuga ma faigofie ona ou malamalama ai.”
A o faagasolo faiaoga ma failauga ole upu ale Atua ile aoaoina o lenei mataupu ole Faatuatua, sa ou lagoina i totonu o lou loto se mea o elieli mai totonu i lou galala faaleagaga oloo iai. Oute lei faalogo muamua talu ona ou lotu ise mataupu faapea e faatatau ile Faatuatua ile Atua ma ua tupu ai lou olioli ma le faatuatua ile Atua e pei ona talanoaina e ana auauna”.
Na taua foi e Hopoate “E leo au ose tagata lotu pe ose kerisiano faatuatua ile Atua, sa ou sau e fai lau galuega pueata peitai olea e foliga mai ua talanoa sao mai le Atua ia te au ma lou ola ma se suiga fou e tatau ona fai.”
“Ole a avea lea ma suiga fou oute fia faia mo au ma si ou toalua ma lau fanau.” Taua e Hopoate.
Ole tasi lenei o mataupu ua mau eseese ai talitonuga o Ekalesia, ole Faatuatua, ma lona faatinoga e tusa ma aoaoga ole Afioga Paia ale Atua. E eseese ekalesia, ese foi o latou faatuatuaga ma le faauigaina.
O lenei aoaoga ile faatuatua sa faamamafa ile vaevaetonuina o ituaiga faatuatuaga. A ole autu tonu na fa’aautu iai le aoaoga ma mataupu, ole faatuatua ile Atua ma lona Alo pele e toatasi o Iesu Keriso ma lona mana.
O failauga uma o lenei aoaoga sa aotauina ile aoga ale Rhema i Okalahoma i Amerika, i lalo o aoaoga ale susuga ia Kenith E. Hagin. O Kenith Hagin ose tagata mai i lona fanau mai, peitai na faamalolo e le Atua i lona faatuatua ma ia tusia ai ni tusi ma aoaoga e faatatau ile faatuatua i Amerika ma faaigoaina ai o ia i totonu o America ile vaitau ole 1980 agai mai tausaga i luma mai ole tama ole faatuatua.
Ole susuga ia Tafa Faamatala le tasi o failauga ole Semina, o ia lea ole Samoa muamua na aotauina ma faauuina ile tausaga faaiu ile 1991, ae amata aotauina ai le susuga ia Faaiu Faaiu ma lona faletua ia Traci Faaiu, ae muliai ai le faafeagaiga ma lona faletua ia Dan Magalei ma Mable Magalei ile tausaga e 1994.
O mataupu ole faatuatua na aotauina ai i latou i lea vaitau, faatasi ai ma vavega sa o latou vaaia foi ile galue ole Agaga ole Atua i lea vaitau ma faataunuu lana Afioga e ala lea i faamalologa ma le toe faatutu o e ua feoti e Kenith Hagin ona ole Faatuatua ile Atua ma lona Alo ma le mana ole Agaga Paia.
Ole ala foi lea ole fia faasoa mai i tagata nuu o Samoa o lea mealofa ua tuuina atu e le Atua i o latou olaga ma faalauaitele lenei mataupu ole Faatuatua ile Atua ma lona Alo o Iesu Keriso.
Na taua e le susuga ile faafegaiga ia Elia “O lenei fonotaga faa-le-faatuatua poo le (Faith Explosion) ole a faamau i lalo ole kalena ale Ekalesia mo tausaga uma ina ia aoaoina pea tagata Samoa i lenei mataupu ina ia tupu tele le faatuatua o tagata Samoa ile Atua, ae le o talitonuga poo tagata.”
Ta’ua foi e Elia, “Ole tasi o Afioga na faavae iai lou faatuatua ina ua maua le tala o si o matou Ekalesia e talimalo, ole Filipi e 4:14 Oute mafaia mea uma ile faatasi mai o keriso ia te au” E ui ina toaitiiti le matou Ekalesia ae tele le Atua lea matou te auauna i ai, ia toe faafoi lava le viiga ile Atua ile e ona le malosi uma lava”.
Ole Faith Explosion ose tofa mamao na ave e le Atua ile susuga ile faafegaiga ia Faaiu Faaiu ole Ekalesia Word of Faith i San fracisco e pei ona ia taua “Ole tausaga e 2005 na ou malaga mai ai i Amerika i nei Niu Sila, ae aumai e le Atua lenei faaaliga na ou vaaia ile malae va’alele a o ou faatalitali mo le taimi o lau malaga”.
Taua foi e Faaiu “Sa ou fesiligia le Atua po’o ai e faatinoiina, faatasi ai ma le tau e faatupeina ai femalgaaiga peitai o ia na amata toe talanoa mai ai le Atua ma fafagu le faatuatua ia te ia ma toe aumai ai e le Atua ia te ia, i latou e pei ona aotauina faatasi ile aoga ale Rhema Okalahoma, e ui e eseese tovine oloo galulue ai”.
Ole tolu ai nei o tausaga o faatinoina lenei aoaoga, ma e eseese uma atunuu na faia ai e pei ona taua e Faaiu. “Ole galue ole Agaga ole Atua matou te faamoemoe iai, olea foi matou te mulimuli iai, matou te le iloa poo fea leisi mea ole a faasino mai e le Atua mo lenei misiona ole Faatuatua. Ole faia mai ole semina i Niu Sila ma talimalo ai le Ekalesia ole Living Word Christian Center i Papatoetoe, ose talosaga ale susuga ile faafeagaiga ia Elia Sipaia, sa ia maua lenei aoaoga i luga ole upega tafailagi ma ia fesootai atu”.
Na ia taua foi “O lou toalua ma ma lau fanau oloo matou malaga faatasi mai e silia ile sefuluafe America le faatupeina o matou pasese ma faletali malo, peitai ole usitai ile Atua, o ia lea na ia foaia mai tupe e totogi ai pasese ma mea uma oloo matou moomia.”
Faatasi ai ma isi failauga oloo iai pei ona taua e Faaiu “E totogi lava e le tagata ia lona pasese ma faatupe e ia, ona ole naunautaiga ia malamalama tagata ma tuputupu ile faatuatua ile Atua, ona e tupu le faatuatua ile taulogologo ile Afioga ale Atua”.
Ole totogiina o faasalalauga ma le nofoaga e faia ai le faamoemoe ile Ekalesia Living Stone i Magele, na faatupeina e le Ekalesia ole Living Word Christian Center ma le tele o auaunaga ma meaai moi latou o e na auai.
