Ua folasia se lagona o le afioga i le Palemia o le taitai o le vaega faaupufai o le HRPP ma ia faailoa ai, o le faipule tamaitai filifilia o Gagaifomauga Numera Muamua, o se tasi o faipule malosi lea o lana vaega faaupufai.
O le feiloaiga a le Palemia susuga Tuilaepa Lupesoliai Sailele Malielegaoi, ma tusitala na faaali ai sona lagona i le faiga filifiliga a lea itumalo i lana palota laititi sa faatino i le Aso Faraile 15 o Aukuso 2014.
Na saunoa Tuilaepa ma ia ta‘ua o lona talitonuga e faavae i le tulaga ona o le sui faipule tamaitai ua filifilia e lona itumalo sa tele tausaga sa galue ai i le Malo ma avea ai ma se tasi o faauluuluga lea sa tauaveina le tofiga Pule sili poo le Faatonu o faasalalauga a le Malo i le leitio o le 2AP. “O se tagata ua masani i le tautala auā o le tele o tausaga o lana tautua ua iloga ai foi lona sao i le atunuu ma le Malo”.
E 270 palota na maua e Faimalotoa i le faitauga aloaia mulimuli ma o ia lava na pito maualuga palota na ia maua. Peitai a fua i le toafā o sui faatutū o le HRPP mo lea palota laitiiti, na tulaga lua le isi HRPP, tutolu atu i ai le isi sui faatū, tulaga fā le isi, ae faatoa tulaga lima ai le sui o le Tautua Samoa.
O le finagalo o Tuilaepa o le mau faamaoni lea o le malosi ma le maualuga o le lagolagoina o le HRPP e le itumalo o Gagaifomauga Numera Muamua. O le paeaiga a le Palemene o loo loma i le masina o Oketopa 2014 o le a maua ai le avanoa o le faipule tamaitai e sausaunoa ai i lana uluai saunoaga faataupou. O lona finagalo na faaalia i tusitala, o le a ia faaauau pea galuega lelei sa faia e le sui faipule o lona itumalo ua fai i lagi le folauga le tofa Tuilo‘a Anitele‘a Tuiloa.
O le faaiuga o le vaiaso ua tuanai atu nei sa faatino ai e le tamaitai faipule ma lona aiga se faaaloalo mo le faafaletui a le HRPP, o se taumafataga mo sui mamalu uma o le vaega faaupufai, faapea se sua faaaloalo mo le taitai o le vaega faaupufai le afioga i le Palemia.
O le mae‘a o lea faaaloalo maualuga na liliu ai tapenaga a le faipule tamaitai ma lona aiga i le faia o lona oo i lona itumalo lea sa faatofulia uma ai fuaiala eseese o Gagaifomauga Numera Muamua. O ie o le Malo na tatala, o palapala a malo ma tupe lea e silia i le lua sefulu afe na faaalu ai. O le tulai mai o le tofa Faimalotoa o se isi lea matati‘a maualuga ua ausia e le ituvai o tina ma tamaitai ina ua avea o ia ma uluai tamaitai ua avea ma faipule o lona itumalo. Ua toatolu ai nei ia te ia sui faipule tamaitai i le paeaiga o iai nei a le Palemene ma le Fono Aoao Faitulafono a le Malo Tutoatasi o Samoa.
