O le po ole Aso Tofi na faia ai aiava faamavae a aulotu o Pulega e lua Sisifo ma Matu EFKS Matagaluega EFKS Kuiniselani ma le au lakapi ale Under 18 mai Samoa ao lumanai le taaloga faaiu ile Aso Faraile. E ui lava ina malolo i a latou taaloga ao le agaga sili na taua, ole fiafia ma le taalo faatamalii, aemaise ose uluai taimi lea ua malaga mai ai nisi o tamaiti i Kuiniselani.
Na faaiuina ise fiafia tele ile po ole Aso Faraile na tea nei lea sa valaaulia ai le mamalu ole atunuu, ele gata o aiga ma uo ae faapea le Matagaluega EFKS a Kuiniselani.
Na faaalia le valevale alofa o auauna paia ale Atua ma tagata lotu faapea tau’aiga e le gata o seleni ao faalavalava aua foi le aumalaga tainane le ofisa ale ‘au na malaga mai.
Viia le Atua na maua le latou seleni e tusa ma le $14,700.00 ile po ole Aso Faraile ae le taulia ai le valevale alofa i tagata taitoatasi lea sa faia ai le aiava ile aso ananafi ma tufatufa ai aua le aumalaga.
O le vaiaso nei ua faamoemoe e amata toe taliu atu ai le au faapea le ofisa ma nisi o matua sa malaga mai lea foi sa malaga mai ai le susuga ia Fonomaitu Vani Tufuga (Leitio ale Talofa FM)
Avea le Samoa Times e momoli atu ai le le agaga faafetai mai le ofisa ole ‘au ma le aumalaga i le susuga ile toeaina ia Rev Lau’ie ma le faletua ia Autalaga Lupematasila, Rev Lance & Lite Tautiepa, Rev Petaia &Sarai Tu’ifao, faafeagaiga ma aulotu taitasi ae tainane uo ma aiga mo seleni ma taumafa sa faaaluina ona ole aumalaga.
E pei o upu masani, ele vale sou taui, e sili le manuia o le na te foa’i nai lo le na te talia.
