Faigata se tali o sitiseni a le Pasefika

O le tele lava o mataupu ua tele tausaga o lagalaga e atumotu laiti e aofia ai foi ma Samoa o le itu lea o suiga ogaoga o le tau, o le liu suavaia o pole i Matu (North Pole) i le aisa o loo iai ua siisii ai lava le sami ma o atumotu laiti aemaise i le Pasefika ia e matuā lagona le aafia i nei suiga. O le Pasefika ua iai atunuu e tolu o atunuu e lima o le lalolagi ua lē toe mafai ona nofoia i se taimi umi i le lumanai ona o le magoto pea i le alititai ma o le unai ua iai nei ina ia iai nisi nofoaga e tatau ona ave i ai tagata nei.

E pei ona ta‘ua e le Ulu o Tokelau i le fono o faatautaia nei, “… e lē o se matou filifiliga le ola a‘e i Tokelau, o le filifiliga ma le tofiga mai i le Atua”. Peitai o lea ua satia leaga lava Tokelau ma e mautinoa lava i se taimi lata mai i le agai i luma o le soifua ua magoto uma le motu.
E manino o loo iai le matafaioi a Niu Sila ia Tokelau ae o isi motu e pei o Kiripati, Tuvalu, le atu Malesala ma isi, e faigata tele ona saili nisi atunuu tetele e mafai ona agai ma faamautu ai. Sa laga i le fono o lenei vaiaso le taumafaiga a se aiga Kiripati lea na talosaga ai i Niu Sila e talia lo latou nofomau ona o tulaga nei ua iai lo latou motu, peitai e lei talia ona e lē o iai se tulafono e mafai ai ona faatino lea tulaga.

O lea na fesiligia e le tatou nusipepa le tamaitai Minisita o le Va i Fafo a Ausetalia ia Julie Bishop i sona finagalo poo se finagalo foi o Ausetalia i lenei mataupu, ae na ia faaalia ai o loo tatala lava le avanoa e Ausetalia pe afai e laga le mataupu lenei i le fono a taitai o loo faatautaia nei i Samoa. Peitai o le faamuamua o loo ave i le saili o auala e mafai ona faaauau ai le nonofo a tagatānuu o motu nei ua aafia i o latou atunuu i lenei taimi a o taumafai le lalolagi e saili se fofo o lenei faafitauli o le aafia o le siosiomaga o motu laiti ona o suiga ogaoga o le tau.

Ta‘ua e lenei tamaitai o le tele lava o tagatānuu nei e lē o fia o ese ma o latou motu ona o faasinomaga na soifua ma ola ai, peitai afai e oo i se taimi ua leai lava se isi fofo ua goto ifo lava nei motu, ona pau le latou galuega i Ausetalia o le iloilo o le mataupu ma silasila i ai. O le tali foi lea a le tamaitai ua faauluulu i ai atinae a Malo Aufaatasi o Helen Clark, lea na ia ta‘ua e lē mafai ona taofia le suiga ua iai le tau ae e lei agai i ai le tulaga o le faamalosia o tulafono ma o le a agai lava i ai Malo Aufaatasi pe afai ua oo i le taimi e silasila ai i lenei mataupu.

O le mau a le toatele o sui usufono mai i atumotu o le Pasefika, e leai se isi taimi e tatau ona silasila i ai malo tetele i lenei mataupu, ona o lea ua goto ifo lava motu nei ma e leai se isi taimi e tatau ona vaavaai ai i ni nofoaga fou e agai i ai. E lē o talanoaina le mataupu lenei i le fono a le SIDS o loo faia i Samoa ma ua lagalaga e nisi o faalapotopotoga tuma‘oti faavaomalo le lē talanoaina o lenei mataupu i le fono ua usuia nei i Samoa.