Faigamalo lē tumau o minisita lagolago ma le Kapenta

Le faigamalo lē tumau o loo faaauau pea a latou galuega
Le faigamalo lē tumau o loo faaauau pea a latou galuega

O taavale a le Malo o loo faaauau pea ona faaaogā e Minisita lagolago uma a le faigamalo o le HRPP faapea foi ma Minisita uma o le Kapeneta. O lona uiga e ui ina faata‘ape le Palemene o loo tumau pea faamanuiaga o totogi ma isi vaega i faipule uma o le itu a le Malo ona ua faailoa e le Palemia o le minisita lava o le minisita.

Sa fesiligia e se tasi o sui tauva o le Tautua Samoa le afioga Le Tagaloa Pita le tulaga ua ia molimauina ona o le faigamalo lē tumau poo le caretaker government pe a mae‘a ona faata‘ape le Palemene e na o le Palemia ma Minisita o le Kapeneta. O isi faipule uma ua faamuta lo latou toe tauaveina o tofi ma isi tulaga sa galulue ai ma ua muta ai foi ma le tuuina atu i ai o faamanuiaga e pei o totogi.

Peitai o le faatasiga a le HRPP ma ana sui tauva o le palota tele o loo lumanai nei i le masina fou o Mati, na faailoa ai e le Palemia lē tumau le susuga Tuilaepa Lupesoliai Sailele Malielegaoi, ua aiaia faaletulafono le aofia uma o minisita lagolago i le lio o le faigamalo lē tumau pe a uma ona faata‘ape le fono aoao faitulafono poo le Palemene.

E 35 faipule o le HRPP o le paeaiga ua faata‘ape a le Palemene ma o le aofaiga uma foi lea o le pulega o le faigamalo lē tumau. Faaalia e le Palemia e tele galuega o loo faaauau pea ma e manaomia ai ona tumau pea minisita lagolago i totonu o le pulega.

O faipule o le Tautua Samoa e toasefulutasi ua lē toe avea ma faipule ma ua faamuta foi o latou tofiga sa filifilia i ai i totonu o komiti a le Palemene. Ua muta foi ma faamanuiaga tau totogi.

Faaalia e Le Tagaloa Pita e tatau ona faamanino lelei lea vaega o le Tautua a se faigamalo sa tu i le foe ona e ao ona mulimulitaia aiaiga ma tulafono e faasino ia i latou i totonu o le faigamalo lē tumau.

O loo ilitata le Tautua Samoa i le tulaga ua aliali mai ona o lo latou talitonuga e lē fetaui. O loo finau pea lea vaega faaupufai afai e tulai mai e avea ma faigamalo fou o le a latou faatu se itutino poo se faamasinoga e suesue ai faiga piopio ma faiga faaalatua poo se Corruption Tribunal.

Peitai o le finagalo o le Palemia na ia ta‘ua ai i le feiloaiga ma tusitala ua iai itutino o le Malo e pei o leoleo, le Suetusi Sili a le Malo, ma komisi suesue e filifilia e se faigamalo e silasila i ni faaletonu e tulai mai e aafia ai tagata faigaluega a le Malo ma taitai o le Malo.