Faifeau Samoa faauu a le EFKS 2018 ma tax a le malo

O se vaaiga lena i le lotoā a le ekalesia i Malua
O se vaaiga lena i le lotoā a le ekalesia i Malua

O le Aso Toonai na tea nei 19 Me, na faauu ai tofiga FS Faifeau Samoa a le EFKS Ekalesia Faapotopotoga Kerisiano Samoa i Malua a le to’a 24 o ana A’oa’o, ua ta’i tausaga, lua, i le tolu tausaga talu ona faauu i le uma ai o latou aoga faafaifeau, ae o lea ua faatoa faamaonia ai e avea ma Faifeau Samoa. E agavaa ai ona o latou faatinoina sauniga o maliu ma faaipoipoga.

Peitai o le isi lea o luitau na fesiligia ai se vaega o faifeau faauu nei, ona o le tulafono a le malo, e tatau lava ona usitaia e tagata uma o loo maua alagatupe, pei o le aufaipisinisi, o tagata faigaluega, ma tagata lautele e faatauina oloa mai faleoloa, ona totogi lafoga poo tax.

Peitai mai le 24 o Faifeau, o ta’ua i lalo o latou suafa ma latou faletua, na faauuina, na oto mai ai se vaega e fesiligia i le mataupu lea tau i le totogiina o lafoga.

E uma ane le faatalanoaga, e autasi uma lava i latou na filifili mai e tali le fesili, i le faapea mai e faamoemoe le latou faaiuga e totogi le lafoga pe leai foi, i se tala mai toeaiina, pe a mae’a le fonotele.

O le susuga Clay Tofilau o Iva Savaii ma le faletua ia Eseta o Avao Savaii, o loo galulue fesoasoani i le ekalesia i Vaitele uta, na faapea mai, “O le ā lava le tala a toeiina i le uma ane o le fono o le mea lava lena e fai.”

O le Susuga i le FS ia Sumeo Leota ma le faletua ia Sauimalae mai Falelatai ma Vaiusu, o loo galulue ai nei i Niu Sa Uelese Ausetalia, na o la ta’ua e faapea, “E lagona le fiafia ma le loto maulalo, i le faaaogaina o matou tagata faaatauvaa e fai ma sui o le galuega a le Atua i Sini Ausetalia, i lalo ole pulega a Kolia, ole pulega a Sini i Sasa’e. Na i’u i le 2016, ae amata galuega i le 2017, ma ua faauu ai nei i le 2018.” E leai se silafia o le Susuga Sumeo i le lafoga.      

O le Susuga ia Seumaninoa Puaina o Leone Amerika Samoa, ma le Faletua Neda o Vatia Saleaula “e faafetai i le Atua, e lagona le loto maulalo, e tusa ma o ma’ua tagata faatauvaa, e ui ina e lē o auai le tina ua fai i lagi le folauga, ae lagona le loto tele i le faatasi mai o aiga.” Ae o le mea tau i le totogiina lafoga a faifeau, “O le ā lava le tala a le ekalesia e fai mai e usitai i ai matou.”

E oo lava foi i le faifeau lenei ua faitau tausaga talu ona tausi nuu i le afioga o Samatau, le susuga Julius Fruean ma le Faletua ia Lenitali. Na ia talanoa, “E faaetete lava i le mataupu ona e lei faia se faaiuga a le fonotele, ma e faatali i ai se’i faia se faaiuga a le fonotele i le vaiaso nei.

I le sauniga o le faauuga o Faifeau Samoa, na ta’ita’i le sauniga e Rev. Elder Lucky R Slade. O le susuga Iosefa A Uilele FT Faifeau Toeina, o le failautusi o le Komiti le Au Toeaina na gafa ma le faamatalaina o le au Faauu. O le Susuga i le FT o Apia, ia Siolo Tauati na faitauina le Tusi Paia. Ma le tatalo o le faauuga, na gafa ma le Susuga Lau’ie Lupematasili FT Kuiniselani.

I le uma ane o le sauniga i le malumalu Iupeli, ma faia le faa’ula i fafo mai, ae o le feofoofoaiga a aiga ma uo a  faifeau ma o latou faletua, ae ua amata foi ona vevela ifo le la, ma saga matagofie ai le faamoemoe i le lagilelei o le taeao ole faauuga i Malua.

O Faifeau na faauuina e aofia ai, Peteru Fiaumi Taula ma Vaasiva  Malua, Poasa Lusi Toiaivao ma Lemina o Faleata, Sekoa ma Levasa Teevale o Aana, Seumaninoa Puaina  ma Neda o le Kolisi Malua, Sumeo Leota ma Sauimalae  o Niu Sa Uelese Ausetalia, Tasele Tuluauau ma Tine o Malua, Ulale Sakaio ma Usufono o Falealili Safata Siumu, Vaielle Lemalu ma Eseta o Niu Sa Uelese Ausetalia.

Apela Ah Him ma Foketi o le Kolisi Malua, Clay Tofilau ma Eseta o Faleata, Ekepati Va ma Pomate o Manukau Niu Sila, Etiveni Tavao ma Siileviiga o Apia, Farani Pauga ma Sino o Malua, Filemoni Tuigamala ma Apha o Aukilani, Iaiopo Ropati ma Aneta o Niu Sa Uelese Ausetalia, Iopu Kalepo ma Talalele o Faleata, Julius Fruean ma Leitali o Aana, Karanita Petaia ma Elena o le Kolisi Malua, Komisi Samuelu ma Mercy o Apia Sasa’e, Maligi Setefano ma Fofoga o Aukilani, Mose Malaga ma Uputaua o Faasaleleaga, Motusaga Lesa ma Tanya  o Falealili Safata Siumu, Peniamina Neueli ma Eseta o Aana, Perkins Waterhouse ma Olataga o Aukilani.

Ae i le mataupu lava ia o le lafoga a faifeau, e atagaia mai e usitai uma faifeau i se faaiuga o le a autasi i ai le Fonotele i Malua o loo faagasolo i le vaiaso nei.

Ae o le finagalo faaalia o le ta’ita’i o le malo, le Susuga Tuilaepa Lupesoliai Sailele Malielegaoi, o le lafoga o le mea tau i le tagata e toatasi, le faifeau, ae lē o le ekalesia.