Ile tatou lomiga ile vaiaso ua mavae i tala i taaloga ale Auckland Samoa, na faaata atu ai le taaloga faitaulia ile va ole Apia Maroon male ‘au malosi lenei mai Laulii lea ole a fetaui ile vaiaso nei e sailia ai se ‘au e sao atu i luga ole Top 4 poo le 4 pito i luga ole taamilosaga.
Ole Aso Toonai la ua mavae na faataunuuina ai loa lea taaloga mataina ile va o ‘au nei e lua, ma ose taaloga matagofie le finau o tama taaalo ile silasila male maimoa ale autapuai aemaise ai ole mamalu ole atunuu oloo molimauina nei faagatama i Aso Toonai taitasi.
Ile ‘afa muamua ole taaloga, toetoe lava a uma le 40 minute ae faatoa tau ‘ai le Apia Maroon ile sala na kikiina ele numera 10 ma maua ai uluai ai ole taaloga 3 ile leai. Ole pisapisao male vevesi ole autapuai na maua ai ni lagona o nisi o tagata e ono tulaga faaletonu le iuga ole a oo iai lenei taaloga auā o lea ua vaai atu ile ata na ole 3 ai ole Apia Maroon ile leai.
Na faatalitali le aumaimoa poo le ā se suiga ole a agai iai faiaoga o ‘au e lua, ma se isi gaioiga e faatamoe ai le polo mo ‘au ile ‘afa lona lua. Peitai ole 5 minute talu ona amata le ‘afa lona lua ae faateia loa le aumatamata male autapuai ale Apia Maroon ile emo ane ole numera 13 le alii o Lui Morel ile laina sikoa ma maua ai le isi ‘ai faaopoopo mo Apia.
Ma ole taimi foi lea ua vevela faasolo atoa ai tino ole Apia Maroon ma toe maua le isi malosi faaopoopo, e maua ai nisi ai mo lana ‘au. E 2 sikoa na toe mauaina ile latou numera 10 le alii o Alai male sikoa maua fua ina ua faatamala le laina i luma ale Lion ile tuleiina ole sikalamu ma maua ai ‘ai e 20 faatasi ai ma kiki ile pou ale alii o Patrick Palepua ma tulai mai ai sikoa ole taaloga 27 ile leai.
Ile toe 10minute o totoe ole taaloga e lei faavaivai ai le osofai pea o Laulii e faafetoai le Apia Maroon ile fia maua o sana sikoa, ma o lea na tini lava lea finauga ina ua laasia ele numera 2 le laina sikoa ma mae‘a ai loa male taaloga. E ui ile malolo o Laulii poo le Lion i lana taaloga ae o foliga fiafia male malolo faatamalii o tama taaalo na pito sili lea ona manumalo i loto ole tapuaiga ale au tapuai.
Ma ole tāua foi o lenei taaloga ia Laulii e tapena atu ai lana ‘au mole lu‘iina ole talita ile vaiaso nei oloo umia nei ele ‘au malosi a Malisi.
