Faiaiga faamalosi i le afafine moni ma le teineititi o le aiga tuaoi

E leai lava se isi faaiuga a le faamasinoga maualuga e talafeagai ma solitulafono o le faiaiga faamalosi pe a faamaonia, o le falepuipui lava. O le faasalaga foi lea mo se tamā ua 46 tausaga le matua o le soifua na ioe i solitulafono o le faiaiga fai faamalosi, na ia faatino i se teineitiiti 12 tausaga le matua o se aiga tuaoi, ma le afafine moni o lē ua faasalaina e 14 tausaga le matua.

O faamaumauga a le faamasinoga maualuga ua faailoa ai e valu tausaga le umi o le faasalaga ua amata tuli nei o le tamā mai Aleisa ma Faleasiu.  E lē o tapu ona faailoa e le faamasinoga le suafa o le tamaloa, ae ua taofia pea le faailoa o lona suafa ona o manumanuga i aafiaga o teineiti e toalua na aafia aemaise o le tasi o i laua o le alo tamaitai moni e faasino i lē ua faasalaina.

E toasefulu le fanau a le tamā e aofia ai ma lona afafine na aafia, ae o le isi teineititi 12 tausaga o se tasi o se aiga e tuaoi ma le aiga o lē ua molia. Fai mai leoleo ia latou faamaumauga, o le teineititi 12 tausaga le matua na alu e faatau i se faleoloa, ae valaau atu i ai lē ua molia e alu atu i lana feau. Na alu i ai e aunoa ma lona iloa se mea o le a tupu.

Na faatino ai loa le solitulafono ma e faalua ona faia e lē ua molia. O lona afafine na toe tolotolo i ai i se po ma faatino ai foi le solitulafono lava lea. O le silasila a le faamasinoga e lē o ‘asa se masina ma se tausaga ma oo atu mataupu faapenei, ma o le mau masani a le faamasinoga, o faasalaga faafalepuipui e momoli atu ai le feau ia i latou o faamoemoe ma fuafua e faia lenei solitulafono o le latou iuga lava o le falepuipui.

O le tagai foi a le faamasinoga ua faatuputupulaia nei ituaiga o solitulafono ma ua lamatia ai le ola saogalemu o fanau teinei laiti, aemaise lava o le solitulafono o le mataifale ua saoasaoa. E lē gata i le va o se tamā se tasi o ona alo teine, ae ua aliali mai foi i le va o le tuagane ma le tuafafine ma ua matuā solipala ai le va tapuia o loo mamafi ai Samoa o le meauliuli i le mata o le tama tane o le tamaitai ma lona tuafafine.

O le masina na tea nei na faasalaina ai se auso tama e toalua ina ua la ioe i le solitulafono o le faiaiga faamalosi ma lo la tuafafine. E lē na o le pau ai lea o se mataupu faapea ua oo i luma o le faamasinoga maualuga.

E maualuga le manatu o le toatele, ua lē o toe malu fanau teine ma tamaitai laiti o le atunuu ona ua osofaia pea i faiga matagā. O le galuega a ekalesia ua faalagolago i ai le toatele ia maua ai se fofo, ae o le lagolago foi a faalapotopotoga tumaoti o loo feagai ma nei mataupu e iai le talitonuga o nisi e mafai ona tafi esea ai.