O masina o Aukuso ma Oketopa ole tausaga ua mavae 2016 na faia ai le faaiuga ale Kapeneta e faamalolo le tumau le Faatonu ole Ofisa o Moliaga solitulafono o Mauga Precious Chang ma le sui faatonu o Miruel Lui.
O nei tamaitai oni loia sinia sa tautua muamua ile Ofisa ole Loia sili ale Malo a‘o iai faatasi galuega ole finauina o moliaga solitulafono, seia oo ina pasia le tulafono ele Palemene ma faatuina ai le ofisa o moliaga solitulafono ma filifilia ai Mauga Precious Chang e avea ma Faatonu ma Miruel Lui ose loia sinia ma ole sui Faatonu.
Ose alii faamasino mai Niu Sila o Sir Robert Grant ua filifilia ele Kapeneta e faauluulu iai le suesuega o ia tamaitai loia sinia ae lagolago iai se tasi o tamalii ole atunuu sa avea ma Loia sili ale Malo i tausaga ua mavae ma sa avea foi ma faamasino ole faamasinoga faavaomalo le tofa Tuiloma Neroni Slade ma le sui ole Sosaiete a Loia i Samoa le afioga Alalatoa Rosella Papalii.
Ole suesuega ua faaagasolo ile vaiaso nei oloo agai ile feteenaiga na tulai mai ile va ole Ofisa o Moliaga solitulafono ma le ofisa ole Loia sili ale Malo ile faaiuga na molia ai le Komesina o Leoleo.
O moliaga ia e pei ona silafia na toe faasolomuli i tua ese loia mai Niu Sila na totogi ele Malo ona ua le lava molimau e lagolago ai. Ole feteenaiga lenei na aliali ini fetusiaiga a ofisa e lua na manino ai le tutoatasi ole faaiuga ale ofisa o moliaga solitulafono ile faia o moliaga ole Komesina, ae na faailoa foi ele Loia sili i lana foi pepa o faasalalauga o lona ofisa oloo iai le pule tutasi o moliaga solitulafono.
Ole mafuaaga lea na faia ai le iuga ale Kapeneta e faamalolo le tumau le Komesina o leoleo ia Aukuso, ae faia foi ma le isi faaiuga e faamalolo le tumau le Faatonu ole ofisa o moliaga solitulafono.
Na mafua lea faaiuga ona oni moliaga tau taavale afi na tuuaia ai le Faatonu, ma ua maea ona suesueina ia moliaga ma ua le faamaonia, peitai, oloo toe apili ele itu a leoleo na tauave ese loia mai Niu Sila le faaiuga ale faamasinoga.
Na tuu le vaaiga ole ofisa ile tamaitai loia sinia o Miruel Lui ae na iai foi se feetenaiga na tulai mai ai ma le ofisa ole Loia sili ale Malo. Na faia ai foi le faaiuga ale kapeneta e faamalolo le tumau lea ofisa sinia ole ofisa o moliaga solitulafono.
Talu mai la le tausaga ua mavae sa faailoa ai ele kapeneta le tuuina atu o lenei feteenaiga e suesue e se Tribunal poo se Komisi suesue sa tatali poo afea e faatino ai.
Ole aso 20 o Ianuari na faapea e faagasolo ai peitai ona ole le avanoa o nisi o sui filifilia na tofia ele Kapeneta na tuu mai ai ile aso 20 o Fepuari 2017. Ua faaalia e lua aso ole suesuega peitai e faatoa mautinoa lea tulaga i taualumaga o suesuega pe ole a faaono faaopoopo ai nisi aso.
