Na alafai le atunuu o Samoa i le taeao o le Aso Toonai na se‘i mavae atu nei i le amataina o le Samoa Half Iron i le taeaopo lava pe tusa o le 6.30 i le taeao.
O se vaaiga uigaese le matagofie na vaaia i le taulaga i Apia, i le toatele o tagata matamata ua pei ua toe faamanatu mai faigamea i le tai i tuuga fautasi.
Na vaaia i lea taeao le toatele o alii ma tamaitai tauva sa malaga atu i Samoa mo lenei tauvaga mai Niu Sila faapea foi Ausetalia ma isi atunuu mai fafo.
Sa tauva ai foi i Samoa lava nisi o le atunuu o loo latou faia lea taaloga i Apia, e pei o le susuga ia Seti Afoa ma nisi o tamalii o Samoa i alo ma fanau.
O nisi o sui tauva faapolofesa i lea taaloga e aofia ai le alii Niu Sila ia Cameron Brown, Graham O’Grady, Tim Berkel, Stephen Farrel, Gina Crawford, Sam Warriner, Jo Carrel, mai Ausetalia sa tauva ai, Michael Murphy, Sarah Crowley, faatasi ai ma le alii ia Tim Marr mai Amerika, ma Takeshi Igarashi mai Iapani.
O i latou uma nei o ni tagata tauva ua loaloa o tauva ai i lenei taaloga faavaomalo i le tele o tausaga. Ma o se fiafiaga tele ia Samoa i le faatinoga o lenei taaloga, o le maua lea o avanoa o alii ma tamaitai iloga i le lalolagi i lenei faagatama e tausinio ai i Samoa.
O se taeao na vaaia ai le matagofie o afioaga i le agai atu lea i le Anoamaa, i le teuina o le alatele seia paia lava le Mafa ma toe taliu ai i Apia. Na matuai malu le puipuiga a alii ma tamaitai leoleo i lea aso atoa, i luga o le auala aemaise lava foi le faafeaoina lea o sui tauva.
Masalo poo le latalata i le 3 i le afiafi na faatoa faamae‘a ai lea faamoemoe, ma taualuga ai i se fiafia tele i le nofoaga autū i le Ofisa o le Pulega a Tagata Tafafao Maimoa mai i Samoa.
E silia ma le 40 i latou sa tauva ai i lea tauvaga e aafia ai ma Samoa, ma o se atina‘e lelei tele foi lea e fesoasoani i tagata e malaga asiasi atu i Samoa aemaise ai lava tagata tafafao maimoa atu i Samoa.
Tasi lenei o molimau i atina‘e ina ia faatosina atu i Samoa tagata asiasi maimoa mai fafo, ma ua faalauiloaina mai foi o le a faaauauina pea lenei tauvaga i tausaga taitasi, ma atonu o le a toatele foi nisi sui tauva fou o le a tauva ai i le tausaga fou i Samoa.
O le iuga la lenei o le tauvaga a le Bluesky Samoa Half Iron
Tauvaga Itupa o Alii
• Graham O’Grady – Niu Sila
• Kerry Weeks – Niu Sila
• Stephen Farrell – Niu Sila
Tauvaga Itupa o Tamaitai
• Sam Warriner – Niu Sila
• Gina Crawford – Niu Sila
• Sarah Crowley – Ausetalia
O faailoga tupe uma o lenei tauvaga
Faailoga Muamua: $6000 NZ
Faailoga Lua: $3,300 NZ
Faailoga Tolu: $2,100
O le uluai taimi muamua lea ua faia ai i Samoa lenei tauvaga ma tauva ai i latou iloga i lenei faagatama i le lalolagi , ma e mautinoa e lata mai lava se aso tatou te molimauina ai se tulai mai o se Samoa e fiafia i lenei taaloga i le lumanai. Faamalo ia i latou uma sa fesoasoani malosi i le tuufaatasia o lenei faamoemoe.
