E fuafua ma silasila mamao taitai o Ekalesia taitasi mo le faaaupegaina ma le aotauina o taitai mo le lelei o le agai i luma o le galuega a le Atua, i soo se matagaluega ma soo se vaega e naunau lava ina ia ogatasi pea le futia ma le umele i le tupu olaola o Ekalesia i fuainumera o tagata lotu, aemaise o le tupu olaola o soifua faaleagaga ma le soifua malamalama i le poto i tiute ma faiva o galulue ai i matata eseese.
E pei ona apoapoai Ietero ia Mose, e totofi ma aotauina nisi taitai e tausoaina le galuega, e taitaia nisi e toaselau, toaonogafulu atoa ma le tolusefulu.
O le vaaiga foi lea na iai le Aso Toonai na tuanai atu lea na faatinoina ai i le aai o Melepone le semina ma polokalame alualu mamao mo le vasega o Faiaoga Aso Sa a le matagaluega a Ausetalia a le ekalesia AOG Samoa.
I le aai lava o Melepone o loo vaaia ma taitaia e le susuga i le sui taitai aoao le susuga i le faafeagaiga ia Ps Onesemo ma le faletua ia Puao Pulepule, ae o le susuga i le faafeagaiga ia Chico ma le faletua ia Toa‘i o le Samoa AOG Christian Fellowship i le pitonuu o Thomastown, o taitai aoao ia o Aoga Aso Sa a le matagaluega atoa a Ausetalia, mo le uluai mafutaga la a Faiaoga Aso Sa o lenei tausaga, lea ua usuia ma faataunuuina ai i le aai o Melepone.
O nisi o failauga faapitoa o le faamoemoe, o le susuga i le faafeagaiga ia Ps Chico, le faafeagaiga ia Ps Manuula Nai mai le aai o Kuiniselani, o le aao tusitusi foi o le komiti o Aoga Aso Sa, ma le faafeagaiga ia Ps Sapati Solipo mai le laumua i Canberra o le sui foi o le komiti o Aoga Aso Sa.
O le manatu o loo faaautu i ai le manulauti o lenei tausaga, o le “Nofo Tupu o Iesu i le Meleniuma.”
O la a le Tusi Paia, “A‘oa‘o le fanau e tusa ma ala o le Atua, a matutua e le toe tea ese ai.”
O le silasila mamao foi lea a le susuga ia Ps Chico ma le komiti, ina ia aotauina pea ma galulue faatasi ma le mamalu i Faiaoga Aso Sa uma a le Matagaluega.
