“Ua teena le apili a Le Mamea Dr Emosi Puni ma ana loia”
Ua lē manuia le taumafaiga a loia a le alii fomai, le afioga ia Le Mamea Dr Emosi Puni, e toe finauina le faaiuga a le Faamasinoga Maualuga na faamaonia ai le moliaga e tasi o le faaoolima matagā o le alii fomai.
Sa finauina e ana loia le faamaonia o le moliaga, i le latou mau e lē mafai e molimau na tuuina atu e leoleo poo le itu tagi ona faamaonia le moliaga. Peitai o le faaiuga a le faamasinoga o talosaga apili ua fai mai ai, o molimau a leoleo o loo manino ai sa tupu le solitulafono.
O Iulai o le tausaga e 2005 na faaulu ai e se tamaitai talavou se tagi i leoleo sa tuua‘ia ai le fomai i lona faia o ni gaioiga e solitulafono a o ia siaki pe o maua le tina talavou i se ma‘itaga poo le ma‘ito.
O le tina ua iai lona toalua faaipoipo ma e toatasi le la tama i le taimi lea.
Sa faaalia i tolaulauga a leoleo ina ua suesueina le moliaga, sa taumafai le ulugalii e fai se va o le la pepe muamua ma se isi pepe e sosoo ai, o le mafuaaga lea na alu ai le tina e siaki se fomai pe ua ma‘itaga ona e iai faalogona tau tamaitai ua masalosalo ai i lea tulaga.
Na muamua alu e vaai se tasi o fomai tamaitai e tuma‘oti lana auaunaga, ma faasino ai e le fomai lea le tina e alu e vaai lē ua molia a o galue i le falemai tuma‘oti o le Medcen, ona o ia o se tasi o fomai e iai sona tomai aoaoina i le itu i le siakiina o ma‘itaga.
O le mafuaaga lea na alu ai lē na aafia ma vaai Le Mamea Dr Emosi Puni, ma aliali mai ai le mataupu e pei ona mafua ai ona faia e leoleo le moliaga. I le faaiuga ua aumai e le faamasinoga apili, o le a lauina ai loa se faasalaga a le faamasinoga i le moliaga ua faamaonia.
O le Aso Gafua o le vaiaso lenei ua faatulaga e tatau ona toe tulai ai lē ua molia mo sea faaiuga.
O le taimi na faamaonia ai le moliaga e tasi o le faaoolima matagā, na faia ai ma se faaiuga a le fono faatonu o le tomai faafomai i Samoa e faamālōlō mo se taimi lē tumau tiute faafomai o lē ua molia, ae faatali ai se iuga o lana talosaga apili.
O se faaiuga e aumai o le a toe iloilo ai se isi faaiuga a le fono faatonu. O le taimi nei e lei toe maua se fesootaiga i le failautusi o le fono faatonu, le alii fomai o Dr Ben Matalavea poo afea e toe fono ai le latou komiti faafoe mo se isi a latou faaiuga.
O le afioga Le Mamea Dr Emosi Puni o se tasi o fomai sinia ua leva tausaga o galue i le Matagaluega o le soifua maloloina.
Sa ia tuua ae galue i le falemai tuma‘oti o le Medcen i Vailima, ma o ia sa faauluulu i ai galuega faafomai uma a lea falemai tuma‘oti, seia oo ina tapunia ona o tulaga faaletonu tau tupe e pei ona umia ai nei e le Malo lea falemai.
