E toavalu tamā na faamanuiaina o latou suafa i le Se‘i a le SamoaTimes i le vaiaso o le Aso Sa o Tamā. E 83 tama na tauaao atu o latou suafa ae na o le valu avanoa sa mafai ona tuuina i lenei polokalame.
O le Aso Lulu la o le vaiaso na tea nei 10 o Setema na faataunuuina ai loa lenei faatasiga i le faleaiga o le Carls Junior i Glen Innes. E toaono tamā sa mafai ona auai atu i lenei mafutaga a o le isi toalua ua lē avanoa ona o tuatuagia faaleaiga.
O Mapusua Mapusua, Pili Vaa Amataga, Kalolo Snyder, Fepuleai F Su‘a, Tauiliili Vaa Robertson ma Tili Feseetui. Sa faapea foi ona mafuta atu ai ma nisi o tina i lea po ona o le fia talatalanoa lava ma fia mafuta i nei alo ta‘uta‘ua o le atunuu.
O le tofa ia Tauiliili Vaa Robertson na saunia le tatalo e tatala ai lenei mafutaga fiafia, ona sosoo lea ma le faaula na saunia e le pulega a le Radio Samoa ma le Samoa Times mo i latou na auai i lea afiafi. O le afioga ia Laauli Michael Jones ma Vaaiga Tuigamala na saunia le taumafataga mo tamā, faatasi ai ma tina na auai.
O se po fiafia lea po i nisi o tamā ona ua mafai ona talanoa faafesagai ma nei tamalii iloga o le atunuu ua ta‘uta‘ua o la suafa i le taaloga o le lakapi. E tele ni fesili na tuufesili ai foi nei tamā matutua i nei tamalii o le atunuu i le taimi a o avea i laua ma tagata taalo a le All Blacks.
Na taliga e fia faalogo le faasoa mai ma le tufa a nei uso a tamā i le taimi a o taaalo, ma le agaga fiafia ma le faafetai i o laua loto ona ua mafai ona taaalo ma taamilo i nisi o malae tetele o le lalolagi.
E iai foi taimi e mafaufau ai i le Atua, poo ai i laua ua manatu mai ai ua la maua ai lenei avanoa e taamilo ai i le lalolagi, aemaise o le misia o laua aiga faapea ma fanau pe a alu le malaga taamilo a le au i nisi o atunuu e atoa le masina.
Na iai foi ni fesili na fesiligia ai le afioga ia Laauli e uiga i taaloga a le All Blacks o loo faatinoina i le Aso Sa ae lē taalo ai? Ae faaali le finagalo o Laauli o Samoa lava ia o Aso Sa e faamamalu mo le tagata kerisiano auā sauniga, ma o Samoa foi e faavae i le Atua ona tagata. O se luitau ma le faamalosi foi mo tamā sa auai e ala ia latou fanau auā le agai i luma.
Na momoli le agaga faafetai a le susuga ia Vaaiga Tuigamala ma Laauli Michael Jones i tamā sa auai ona o le mafutaga manaia ma le fiafia sa maua i lea afiafi.
Sa faapea foi ona tali faitau le tofa ia Tauiliili Vaa Robertson sa fai ma sui o tamā i saunoaga a nei tamalii o le atunuu. Na ta‘ape fiafia le mafutaga a nai toeaiina i lea po ma latou burger faatasi ai ma latou voucher e ta‘i $10 auā nai loomatutua sa faamuli mai.
