E lei nofonofo vale faipule o le Itu agai ma lo latou ta‘ita‘i i le tuusa‘o o finagalo faaalia i le talanoaina o le vaegatupe e lima miliona selau afe tala ($5.1miliona) mo le faatinoina o galuega mo le toe faaleleia o nisi o vaega tāua e pei o alatetele, eletise ma le suavai na faaleagaina i le afā o Eveni ia Tesema o le tausaga ua mavae 2012.
O le faipule o le Vaimauga le tofa Lefau Harry Schuster na fautuaina le Malo ia faia se suesuega ma tapena se lipoti e faailoa atu ai le mafuaaga o le malosi uigaese o tafega o le vaitafe i Lelata faasolo mai i Vaisigano lea na matuā uigaese lea tafe i le malepe ai o fale o nisi aiga ma tafefea meafale ae faaleagaina ai taavale.
O alatele na aafia i le tafe e oo i le alasima i Maluafou na motu lua lea o loo tapunia pea i le taimi nei e lei tatalaina. O le ta‘ita‘i o le Itu agai le afioga Palusalue Faapo II na ia faailoa i le Palemia ma le faigamalo e lē taitai ona lava le lima miliona e faaleleia ai mea na faaleagaina.
O loo fua le faitau a le ta‘ita‘i o le Itu agai i fale ma meatotino a aiga na faaleagaina ae le na o alatetele, eletise ma le suavai. Peitai ua manino i se finagalo o le ta‘ita‘i o le Malo ua mae‘a faaalia, e leai se fesoasoani e maua mo fale o aiga na faaleagaina. O le mafuaaga foi lea o le ave o le tuualalo i ia aiga ina ia aua le nofoai ae agai ane e toe fausia mea ua faaletonu.
O nisi o faipule o le Itu agai na talosaga mo se fesoasoani mo aiga o o latou itumalo ua afaina fale ma e tatau i le Malo ona silasila i se isi fesoasoani talafeagai.
Peitai o ia manatu uma na faamatalaina e le Palemia susuga Tuilaepa L Sailele Malielegaoi i le Palemene, ua o ni saunoaga faatosina mo le isi palota tele.
E talitonu foi le Palemia e faaaogā tele e faipule ni faalavelave faalenatura e aafia ai le toatele o tagata e fai ma faitotoa e faatosina ai loto o tagata palota. O le isi 3 tausaga ma masina e sefulutasi o lumanai e faatoa faia ai le isi palota tele a le atunuu i le tausaga e 2016.
Ua faaalia e le Minisita o Tupe le afioga Faumuina Tiatia Liuga, o le lima miliona ua faatatauina o se vaega tupe muamua lea o le a amata ai galuega o le afā, ae o se taimi ona toe maua lea o se isi faaopoopoga.
Peitai e lei faailoaina e le minisita i sona finagalo i luga o le TV1 poo fea o le a maua mai ai se isi vaegatupe e fesoasoani i le toe fausia o mea ua faaleagaina ona o le afā o Eveni.
