Fai lotu le taitai o le Labour lana vaega faaupufai i le sauniga tuufaatasi a le Ekalesia Katoliko i Malaeola

O le saunigalotu tuufaatasi a le Ekalesia Katoliko Samoa sa faataunuuina i Malaeola i le Aso Sa ua mavae, aso 3 o Aukuso, na auai faatasi atu i ai le taitai o le vaega faaupufai a le Labour, David Cunliffe ma nisi o lana vaega faaupufai.

O le aso foi lea sa faaavanoaina e le afioga ia PateleMikaele Endemann faapea le afioga ia Afuamua Seve o le Peresetene aoao o Malaeola ma le nofo a Peresetene o ekalesia Samoa e 25 i Aukilani ina ia feiloai ai ma le taitai ia David Cunliffe ma sui o lana vaega faaupufai o le Labour seia faafofoga foi le Ekalesia i se saunoaga a le taitai a o loma le faigapalota a le atunuu.

O sui tamomoe o le Labour sa auai atu i lea sauniga lotu i Malaeola, o Carmel Sepuloni i Kelston, o Jenny Salesa i Manukau East, o Jerome Mika i Papakura, ma Anahila Suisuiki o loo i le lisi a le Labour, o le isi sui o le afioga ia Lemalu Herman Retzlaff, le sui tamoe i Upper Harbour e lei auai ona o nisi foi tuatuagia, sa faapea foi ona auai atu isi faipule o le Labour ma sui o le Local Board a Magele ma Otahuhu.

Sa faatasi mai ai foi le afioga i le konesula o Samoa le Afioga ia Faolotoi Fatialofa Reupena Pogi. O nisi o sui o le Ekalesia i Aukilani ma le afioga ia Patele Kelekolio mai Samoa.
O le afioga foi ia Patele Kelekolio na momolia le saunoaga autu o le Misasa. Na ta‘ua i le saunoaga a Patele, e faapea, “O le ata na tusia e se tasi o tamaititi aoga, o le lima o lana faiaoga.”

O le faipule a Magele le Tofa Su‘a William Sio, na saunoa i le amataga, ma faalauiloa sui o le latou faigamalaga i le Ekalesia. Na saunoa Su‘a e lē o toe pogisa le silafaga a le Ekalesia, o lea ua loma le faigapalota a Niu Sila i le aso 20 o Setema.
E ui lava o loo masani ona tatou mafuta, ae ou te lagona e seāseā maua ni avanoa ma le taitai o le Labour. O David Cunliffe ua tele tausaga o avea ma faipule, sa avea foi o ia ma manisita i le faigamalo a Helen Clark, o se tagata ou te matuā lagolago i ai ona ou te talitonu e agavaa mo le tofi Palemia ma o ia foi o se tagata e alofa i le tatou atunuu.

Ina ua valaau le saunoaga a le taitai ia David Cunliffe na muamua lava faafeiloai le Ekalesia i le faa-Samoa, ona faaauau ai lea o lana lauga i le gagana peretania. Sa faamatala e le taitai lona olaga tuputupu a‘e, o ia o se alo o se faafeagaiga Egelani, ma o lona olaga aoga ma le tele o tiute sa tautua ai i le matagaluega o le va i fafo a o lei ulufale i le palemene i le nofoa a New Lynn.
I le mae‘a ai o lana saunoaga sa faapea atu ai i Ekalesia i Malaeola, “ou te tuuina atu lo‘u lima lenei e faailoa atu ai lo‘u naunau ia faamautu le tatou faigauo.

E lē gata i lea, ae faailoa atu ai foi ma la‘u tautinoga ou te galue ma lo‘u malosi e fesoasoani ia i latou uma o loo fia aai, o loo fia feinu, o loo fia maua ni galuega, o loo feagai ma le taugata o fale.”
O le afioga ia Afuamua Seve, o le peresetene aoao o Malaeola sa tali fuaitau i le saunoaga a David Cunliffe ma momoli ai foi ma faamanuiaga mo le faigapalota.
David Cunliffe ma nisi sa auai atu i le sauniga lotu i Malaeola

Jerome Mika ma Father Michael Endemann i Malaeola, ma Lydia Sosene, Chair of Mangere-Otahuhu Local Board ma le vaega a le Labour i Mangere

Su’a, David Cunliffe, Carmel Sepuloni, Jerome Mika, Jenny Salesa ma Taimua a Malaeola ina ua mae’a le sauniga lotu