O le aso sefulu o Oketopa o tausaga taitasi e faamanatuina ai e le malo o Fiti lo latou saolotoga tutoatasi mai faigamalo kolone a Peretania, e pei ona sa amata mai i le tausaga e 1970 i le aso 10 o Oketopa.
E ui lava foi la ua motu mai ma le taula ona o sailiga malo i nei atunuu, ae susue lava o tatou faamalama ma vaavaai pea i atunuu pele na soifua ma ola ane ai.
I lenei foi la tausaga na toe aofia potopoto foi le mamalu ma le paia o tagata Fiti o alala ma papaaao i Melepone mo le faamanatuina o lo latou aso tele, ae o le itu e matagofie ai lenei tausaga, ona na valaaulia ai nisi o le mamalu ma le paia o Samoa, e le gata i taitai o Ekalesia, ae faapea foi nisi o tamaalii aemaise o autaalo sa tauva ai i le taamilosaga o lakapi taitoafitu sa faagasolo mo le faatāuaina o le 42 o tausaga o lo latou saolotoga. Saunoa nisi o tamaalii Samoa na molimauina lea aso, na matuā lagona le agaga faagaeetia ona e ui lava i sauniga uma o le aso, faatasi ma faafiafiaga aemaise o taumafa ma le ‘ava taumafa a Fiti, ae pei lava o le autū atoa o le faamoemoe o le taitoafitu lea na sue siamupini ai se tasi o ‘au a Fiti ma le Paipai Samoa.
E ui lava o le aso o Fiti, ae na sola ma le Paipai Samoa le siamupini ma le faailoga tupe e ono afe tala Ausetalia. Na faamae‘aina le aso matagofie i le faafiafiaga ma le siva tele na toe valaaulia uma ai sui maualuluga o le malo Setete o Vitoria, sa faatasi ai foi ma ni tamaalii o Samoa.
